‘परान’ले पछिल्लो सात दिनमा मात्रै कमायो पाँच करोडभन्दा धेरै
काठमाडौं । चलचित्र ‘परान’ले आकर्षक ग्रसकलेक्सनलाई निरन्तरता दिइरहेको छ । यो चलचित्रले दैनिक ७० लाखभन्दा माथि औसतमा ग्रसकलेक्सन गरिरहेको छ ।
गएको शनिबारसम्म यो सिनेमाले ९ करोड ८६ लाख रुपैयाँ ग्रस कलेक्सन गरेको थियो । यो शनिबारसम्म ‘परान’को कलेक्सन १४ करोड १६ लाख रुपैयाँ पुगेको छ । पछिल्लो एक सातामा पाँच करोडभन्दा माथि ग्रसकलेक्सन गरेको तथ्यांकले देखाएको छ ।
कात्तिक १४ गतेबाट प्रदर्शनमा आएको ‘परान’ले मंसिर ६ गते रातिसम्म १४ करोड १६ लाख ५१ हजार रुपैयाँ ग्रसकलेक्सन गरेको चलचित्र विकास बोर्डको तथ्यांकमा उल्लेख छ ।
‘परान’मा नीर शाह, महेश त्रिपाठी, केकी अधिकारी, प्रवीण खतिवडा, अञ्जना बराइलीलगायत कलाकारको अभिनय छ । दीपक आचार्यको लेखन तथा निर्देशन छ ।
चलचित्र ‘जारी २’ले पाँच करोड ५९ लाख रुपैयाँ ग्रसकलेक्सन गरेको छ । दयाहाङ राई, मिरुना मगर र विजय बराल मुख्य भूमिकामा छन् ।
कात्तिक २१ गते रिलिज भएको चलचित्रमा उपेन्द्र सुब्बाको लेखन तथा निर्देशन छ ।
कात्तिक २१ गते नै रिलिजमा आएको अर्को चलचित्र ‘मन बिनाको धन’ले तीन करोड ४० लाख रुपैयाँ ग्रसकलेक्सन गरेको छ । अशोक दर्जीको मुख्य भूमिका छ । यो चलचित्रलाई टंक बुढाथोकीले निर्देशन गरेका छन् ।
‘जेरी अन टप’ले १२ करोड १९ लाख रुपैयाँ ग्रसकलेक्सन गरेको छ । सुयोग गुरुङले निर्देशन गरेको चलचित्रमा अनमोल केसी, आँचल शर्मा, जसिता गुरुङ, भुवन केसी र केदार घिमिरे मुख्य भूमिका छन् ।
