ओस्करमा पुग्ने पहिलो नेपाली चलचित्र कुन हो ?
काठमाडौं । चलचित्र ‘क्याराभान’का नाममा पनि एउटा रेकर्ड छ, जुन आफैँमा ऐतिहासिक रेकर्ड हो । ‘क्याराभान’ ओस्करमा पुग्ने पहिलो नेपाली चलचित्र हो ।
यो चलचित्र ७२औँ संस्करणको ओस्कर अवार्डका लागि छनोटमा परेको थियो । त्यसयता भने एकाध वर्षबाहेक करिब–करिब नियमितजस्तै हरेक वर्ष नेपालबाट अस्करका लागि चलचित्र सिफारिस हुँदै आएका छन् ।
यो ओस्कारमा उत्कृष्ट विदेशी फिल्मको विधामा छनोट भएको थियो ।
‘क्याराभान’लाई फ्रेन्च निर्देशक एरिक भ्यालीले निर्देशन गरेका थिए । त्यसैले कतिपयले यसलाई नेपाली सिनेमा मान्ने कि नमान्ने भनेर बहस पनि गर्ने गरेका छन् ।
क्याराभान’ले हिमालको कथा भनेको थियो । चलचित्रमा नुन लिन जाँदाको संघर्ष देखाइएको छ ।
यो चलचित्रका मुख्य कलाकार थिन्ले लेण्डुप लामा थिए । नन्एक्टर उनलाई निर्माणपक्षले यो चलचित्रमा खेलाएको थियो ।
एरिकले यो चलचित्र नौ महिना डोल्पामा बसेर हिउँमा चलचित्रको छायांकन गरेका थिए । यसको कथाका लागि तीन वर्ष पढेको उनले बताएका थिए ।
एरिक भ्यालीका ‘द ट्रेल’, ‘नेपाल : बियोन्ड द क्लाउड्स’, ‘हिमालयन गोल्ड रस’जस्ता डकुमेन्ट्री चर्चित छन् ।
