धर्मेन्द्रले गराएका थिए शाहरुखलाई बलिउड प्रवेश
काठमाडौं । किङ खान भनेर चिनिने बलिउड अभिनेता शाहरुख खान यतिबेला बलिउडकै नामी अभिनेताहरू मध्ये एक हुन् । नाम, दाम र काम तीनै कुरामा उनी समकालीनहरूभन्दा अगाडि छन् ।
उनै शाहरूख कुनै समय टेलिभिजन करियरबाट आफूलाई सिनेमामा लैजान चाहन्थे । तर, कसैले अवसर दिइहेका थिएनन् । यसैक्रममा सन् १९९० को दशकको सुरुवातमा दिल्लीका टेलिभिजन अभिनेताबाट शाहरुख बलिउडमा अवसर खोजिरहेका थिए ।
हेमा मालिनीले उनलाई आफ्नो चलचित्र ‘दिल आशना है’मा डेब्यु गराउनेबारे सोचेर शाहरुखलाई भेट्न बोलाइन् ।
उनलाई शाहरुखको ‘साही नाक’ मन प¥यो । तर, उनी पूर्ण रूपमा विश्वस्त थिइनन् । उनलाई शाहरुख परम्परागत बलिउड नायकको छविमा फिट हुँदैनन् कि भन्ने लाग्यो ।
नजिकै, लुंगी लगाएका धर्मेन्द्र चुपचाप बसेर उनीहरूको कुराकानी सुनिरहेका थिए । सायद उनले ‘नर्भस’ युवक शाहरुखको अनुहारको निर्दोषता र आँखाको चमक याद गरे ।
केही क्षण सोचेपछि धर्मेन्द्रले हेमासँग शाहरुखलाई मौका दिनुपर्छ भने । धमेन्द्रको सुझावलाई हेमाले मानिन्, जसका कारण शाहरुखले चलचित्रमा मौका पाए ।
वर्षौंपछि, शाहरुखले बताएअनुसार चलचित्रको छायांकनका क्रममा धर्मेन्द्र सेटमा पुगेर भने, “उद्योगमा आफूलाई एक्लो नठान । यदि, कसैले केही भन्छ भने, भन्नू धर्मेन्द्रको हात तिम्रो टाउकोमा छ । जे भए पनि, म त्यहाँ छु ।”
