‘धुरन्धर’: वास्तविक जासुस र आतंकवादीको कथामा आधारित, तोड्नेछ १७ वर्षको रेकर्ड
काठमाडौं । बलिउडका मल्टी स्टारकास्ट कलाकारहरू रहेको एक्सन-थ्रिलर फिल्म ‘धुरन्धर’को ट्रेलरले चर्चा पाइरहेको छ ।
फिल्मको सार्वजनिक ट्रेलरले दर्शकमाझ ठूलो कौतूहल जगाएको छ । दश दिनअघि सार्वजनिक भएको यो ट्रेलरले ५६ करोड ६० लाखभन्दा बढी भ्युज बटुल्न सफल भएको छ ।
‘उरी: द सर्जिकल स्ट्राइक’ जस्तो ब्लकबस्टर फिल्म दिएका निर्देशक आदित्य धरले यसपटक पनि पात्र र कथावस्तुमा सस्पेन्स कायम राख्न विशेष मिहिनेत गरेका छन् ।
फिल्मको कथा भारत-पाकिस्तानबीचको गुप्तचर युद्ध, आतंकवाद विरोधी अपरेसन र गोप्य मिसनहरूको सेरोफेरोमा घुमेको छ ।
निर्देशक धरले यो कथा वास्तविक घटनाहरूबाट प्रेरित रहेको खुलासा गरेपछि सामाजिक सञ्जालमा फिल्मका पात्रहरू वास्तविक जीवनका कुन व्यक्तिसँग मेल खान्छन् भन्ने बहस सुरु भएको छ ।
कुन अभिनेताको भूमिका कसबाट प्रेरित ?
रणवीर सिंह (अनुमानित: मेजर मोहित शर्मा)
फिल्ममा सञ्जय दत्त र आर. माधवनको भूमिका प्रष्ट भइसके पनि रणवीर सिंहको भूमिकालाई निर्माण पक्षले गोप्य राखेको छ । ट्रेलरमा उनी कहिले पाकिस्तानी एजेन्ट त कहिले भारतीय सैनिकजस्तो देखिन्छन् । तर, उनको हुलिया र घटनाक्रमका आधारमा उनी अशोक चक्र विजेता मेजर मोहित शर्माको भूमिकामा रहेको अनुमान गरिएको छ । ‘इफ्तिखार भट्ट’ को नामले चिनिने मेजर शर्माले हिजबुल मुजाहिदीनमा घुसपैठ गरी कयौं अपरेसन सफल पारेका थिए । उनी जम्मु-कश्मीरको कुपवाडामा भएको भिडन्तमा शहीद भएका थिए ।
अर्जुन रामपाल (मेजर इकबाल/इलियास कश्मीरी)
ट्रेलरको सुरुवातमै एक भारतीय सैनिकलाई क्रूर यातना दिइएको दृश्यले दर्शकको मुटु कमाउँछ । यो दृश्यले सन् १९९९ को कारगिल युद्धमा क्याप्टेन सौरभ कालियामाथि भएको अमानवीय व्यवहारको याद दिलाउँछ । फिल्ममा अर्जुन रामपाल पाकिस्तानी आईएसआई एजेन्ट मेजर इकबालको भूमिकामा छन् । उनको पात्र ‘नयाँ ओसामा बिन लादेन’ भनिने आतंकवादी इलियास कश्मीरीबाट प्रेरित रहेको बताइन्छ । उनले ट्रेलरमा पूर्व पाकिस्तानी राष्ट्रपति जिया-उल-हकको “भारतलाई हजारौं घाउ दिएर रगत बगाऊ” भन्ने सिद्धान्तलाई दोहोर्याएको देखिन्छ ।
आर. माधवन (अजय सान्याल/अजित डोभाल)
आर. माधवनले भारतीय गुप्तचर संस्था ‘र’ (RAW) का उच्च अधिकारी अजय सान्यालको भूमिका निभाएका छन् । यो पात्र भारतका वर्तमान राष्ट्रिय सुरक्षा सल्लाहकार (NSA) अजित डोभालको वास्तविक जीवनबाट प्रभावित देखिन्छ, जो आफ्नो चतुर जासुसी र आतंकवाद विरोधी रणनीतिहरूका लागि विश्वभर परिचित छन् ।
अक्षय खन्ना (रहमान डकैत)
फिल्ममा देखिने अर्को क्रूर पात्र हो, रहमान डकैत । मानिसहरूलाई कसाईले जस्तै काट्न नहिचकिचाउने यो पात्र कराँचीको कुख्यात ग्याङस्टर सरदार अब्दुल रहमान बलोचमा आधारित छ । रहमानमाथि सानै उमेरमा आफ्नै आमाको हत्या गरेको आरोप थियो । उनी सन् २००९ मा प्रहरी इन्काउन्टरमा मारिएका थिए ।
सञ्जय दत्त (एसएसपी चौधरी असलम)
सञ्जय दत्तले फिल्ममा एक पाकिस्तानी प्रहरी अधिकारी एसएसपी चौधरी असलमको भूमिका निर्वाह गरेका छन् । चौधरी असलम तिनै अधिकारी हुन्, जसले सन् २००९ मा रहमान डकैतको इन्काउन्टर गरेका थिए । सन् २००५ देखि २०१४ सम्म कराँचीमा तालिवान र अन्य आतंकवादी संगठनका सदस्यहरूलाई मारेर चर्चामा आएका असलमको सन् २०१४ मा तालिवानको आत्मघाती बम विष्फोटमा मृत्यु भएको थियो ।
१७ वर्ष पुरानो रेकर्ड तोड्ने तयारी
‘धुरन्धर’ कथावस्तुका कारण मात्र नभई यसको लम्बाइ (रनटाइम) का कारण पनि चर्चामा छ । बलिउड हंगामाको रिपोर्ट अनुसार, यो फिल्म करिब ३ घण्टा ३२ मिनेट लामो हुनेछ ।
यदि सेन्सर बोर्डले यो लम्बाइलाई सदर गरेमा, ‘धुरन्धर’ विगत १७ वर्षयता रिलिज भएको सबैभन्दा लामो बलिउड फिल्म बन्नेछ । यसअघि सन् २००८ मा रिलिज भएको ऋतिक रोशन र ऐश्वर्या राय अभिनित ‘जोधा अकबर’ (३ घण्टा ३४ मिनेट) लामो थियो । ‘एलओसी कारगिल’ (४ घण्टा ७ मिनेट) र ‘लगान’ (३ घण्टा ४४ मिनेट) जस्ता फिल्महरू पनि लामो अवधिका लागि चिनिन्छन् ।
निर्माण पक्षका अनुसार, फिल्मको कथा निकै विस्तृत र गहिराइमा पुगेर भनिएकाले यसको अवधि लामो भएको हो । डिसेम्बर ५ मा रिलिज हुने यो फिल्ममा रणवीर सिंह, सञ्जय दत्त, अर्जुन रामपाल, अक्षय खन्ना, आर. माधवन र सारा अली खान मुख्य भूमिकामा छन् ।
