अर्मपर्म प्रणाली बन्द गर
नेपाली चलचित्र उद्योगमा अर्मपर्म मजाले चल्छ । एउटा सिनेमाको निर्देशक, निर्माता र कलाकारले अर्को निर्देशक, निर्माता र कलाकारको चलचित्र रिलिज हुँदा कोही कसैले पर्म लगाउन र तिर्न छुटाउँदैन ।
अझ विशेषगरी प्रिमियरमा गएर एकले अर्काको चलचित्रको खुलेर प्रशंसा गर्छन् । अभिनयको तारिफ गर्छन् । कथाको तारिफ गर्छन् । मेकिङको तारिफ गर्छन् । यसभन्दा एक कदम अगाडि बडेर दर्शकलाई आग्रह गर्छन्, हेर्नैपर्ने सिनेमा छ । हलमा गएर हेर्नुस् । नेपाली चलचित्र र कलाकारलाई माया गर्नुस् ।
चलचित्र जस्तो सुकै बनोस्, तारिफ गर्छन् । एउटाको चलचित्र बन्दा अर्कोले, अर्काको चलचित्र रिलिज हुँदा अर्कोले दिल खोलेरै प्रशंसा गर्छन् ।
एउटै सिनेमा उद्योग अथवा एउटै क्षेत्रमा रहेपछि एकले अर्कोलाई सहयोग गर्नु राम्रो हो, गर्नु पनि पर्छ । पर्दा आफ्नैले आफ्नालाई सहयोग गर्ने हो । यो राम्रो पक्ष पनि हो ।
तर, केमा सहयोग गर्ने भन्ने हेक्का चाहिँ पुर्याउनु पर्छ । चलचित्र राम्रो बनाउन सहयोग गर्नु पर्छ । सहयोग लिनुपर्छ ।
चलचित्रको कथा र पटकथा कस्तो छ त्यसमा फिटब्याक लिने र दिने चरणमा सहयोग गर्नुपर्छ । तर, नराम्रो चलचित्र बने पनि राम्रो भनेर सहयोग गर्ने प्रवृत्ति चाहिँ हटाउनुपर्छ ।
चलचित्र नराम्रो बनाउने अनि अर्को गएर राम्रो भनिदिनुपर्ने अवस्था छ । त्यो पनि जबरजस्ती नराम्रो अथवा चित्त नबुझे पनि मन गाँठो पारेर मनले होइन ओठले राम्रो भनेर भनिदिनु पर्छ । दर्शकमा भ्रम छर्ने काम गर्नुपर्छ ।
अहिलेको अवस्थामा कसैले कसैलाई ढाँट्न सक्दैन । कलाकार र मेकरले राम्रो छ भनेकै भरमा दर्शकले पत्याउँदैनन् । यो प्रवृत्तिले त झन् चलचित्रकर्मी दर्शकलाई ढाँट्छन् भन्ने म्यासेज मात्र गइरहेको छ । त्यसैले वर्ड अफ माउथ राम्रो भएको चलचित्र मात्र हेर्ने बानी दर्शकमा परिसकेको छ ।
निर्देशक, निर्माता र चलचित्रकर्मीले राम्रो भनेकै भरमा चलचित्र चल्ने भए कुन चाहिँ नेपाली सिनेमा अहिले फ्ल्प हुन्थे होला ? सबै सुपर हिट हुन्थे । सबैको बिजनेस ३० करोड माथि हुन्थ्यो होला ।
किनकी आजसम्म कुनै पनि चलचित्रको प्रिमियरमा गएर कुनै मेकर र कलाकारले कुनै सिनेमालाई औसत सिनेमा, नराम्रो सिनेमा अथवा नहेरे पनि हुने खालको चलचित्र रहेछ भनेर भनेको सुनिएको छैन । राम्रै भनेको मात्रै सुनिएको छ । तर, सबै चलचित्र त चलेका छैनन् ।
यसले अर्मपर्म गरेर बनावटी र नक्कली तारिफ गर्दैमा र गराउँदैमा चलचित्र चल्दैनन्, दर्शकले पत्याइदिँदैनन् भन्ने छर्लङ्ग भइसकेको छ । त्यसैले अर्मपर्म गरेर सिनेमा चल्छ र चलाउँछु भन्ने भ्रममा मेकर नपरेकै राम्रो हुन्छ ।
नक्कली तारिफ गराउन प्रिमियरमा बोलाउनुभन्दा आफूलाई विश्वास लागेको, मनले खाएको मेकर, कलाकार, पत्रकार वा अर्को कुनै पक्षलाई चलचित्र बनाउनु अगाडि कथामा, कास्टिङमा, मेकिङमा, पब्लिसिटीमा कसरी काम गर्ने भनेर सुझाव लिएर चित्त बुझेमा सोही अनुसार सिनेमा बनाए त्यो प्रभावकारी हुन्छ ।
त्यसैले कसैले नपत्याउने र दर्शकको माझमा यिनीहरूको प्रतिक्रिया झुटो हुन्छ भनेर बदनाम हुने काम आजैबाट छोडौँ, अर्मपर्म गरेर चलचित्र चल्छ भन्ने गलत भ्रमको चङ्गुलबाट बारिह निस्कौँ ।
कम्तीमा दर्शकप्रति इमान्दार हौँ । कहाँ मेहनत गरे राम्रो चलचित्र बन्छ भन्नेमा बेलैमा सोचेर काम गरे सिनेमा राम्रो बन्न र चल्न त्यो प्रभावकारी तरिका हुन्छ ।
