नेपमेलोले सुरु गर्यो रियालिटी जस्तै देखिने ‘रियल शो’, गायक-गायिकाले गाउनु पर्नेछ आफ्नै गीत
काठमाडौं । नेपमेलो स्टुडियोले नयाँ शो ‘नेपमेलो सिंगर्स अन माइक सिजन १’ को पहिलो एपिसोड सार्वजनिक गरेको छ । शोको पहिलो एपिसोडमा बुटवलकी सुजाता पाण्डेको प्रस्तुति देख्न सकिन्छ । उनले शो मा तेजप्रसाद पाण्डेकाे शब्द तथा संगीत रहेको ‘पहिलो माया’ बोलको मर्मस्पर्शी गीत गाएकी छन् । सार्वजनिक गरिएको कार्यक्रमको पहिलो गीत र सुजाताको स्वरले दर्शकमा थप उत्साह सिर्जना गरेको छ ।
सुजातालाई गितारमा चर्चित गिटारिस्ट सञ्जीव बराइली र बाँसुरीमा रत्न बिकेले साथ दिएका छन् । प्रकाश मिश्राले मिक्सिङ तथा मास्टरिङ गरेको गीत ‘अकाउस्टिक नेपाल’ को स्टुडियोमा खिचिएको हो ।
झन्डै ६ महिना लामो अध्ययन र तयारीपछि नेपमेलोले ‘सिंगर्स अन माईक’ दर्शकमाझ ल्याएको हो । यो कुनै रियालिटी शो हैन । रियालिटी शो जस्तै देखिने यो एक रियल शो हो जहाँ प्रस्तुति दिने गायक-गायिकाले आफ्नै गीत गाउने पर्नेछ । गीत गाउने गायक नै स्टेजमा हुने कन्सेप्ट र नयाँ अवधारणासहित सुरु गरिएको यो कार्यक्रममा कुनै प्रतिस्पर्धा र पुरस्कारको व्यवस्था छैन ।
अहिले कति गायक-गायिकाको गीत सुपरहिट भए पनि सो गीत खासमा कसले गाएको हो भन्ने बारे दर्शक अनविज्ञ रहने भएकाले जसले गाएको हो उसैलाई स्टेजमा उतार्ने नेपमेलोको मूल उद्देश्य हो। आफ्नो यो प्रकारको फरक प्रस्तुतिले दर्शकलाई भरपुर रमाइलो, ज्ञान र आनन्द प्राप्त हुनेमा नेपमेलो विश्वस्त छ ।
दर्शकले यस कार्यक्रममा नयाँ कलाकारका साथै अग्रज र अहिलेका चल्तीका गायक-गायिकाको प्रस्तुति देख्न सक्नेछन् ।
कार्यक्रमबारे जानकारी दिए लगत्तै निर्माण टिमलाई करिब २५० वटा गीतहरू प्राप्त भएका थिए। जसबाट टिमले पहिलो चरणको लागी २४ वटा गीत छनोट गरेको थियो। बाट पनि ५ वटा नाम प्रस्तुतिको लागि फाइनल भएको छ । सोही अनुरूप पहिलो प्रस्तुति बुटवलकी सुजाता पाण्डेले दिएकी हुन ।
