दश महिना पनि टिकेन एलिनाको वैवाहिक जीवन, मानाचामल र अंश हकदाबी नगर्ने
काठमाडौं । गायिका एलिना चौहानले पति विष्णु सापकोटाविरुद्ध सम्बन्ध विच्छेदको मुद्दा हालेकी छिन् ।
चौहानले शुक्रबार पति सापकोटाविरुद्ध काठमाडौं जिल्ला अदालतमा मुद्दा दायर गरेकी हुन् ।
उनले वारेस काठमाडौं महानगरपालिका-३ की ४५ वर्षीया विष्णु सापकोटालाई वारेस राखेर सम्बन्ध विच्छेदको मुद्दा दायर गरेको काठमाडौं जिल्ला अदालतले जनाएको छ ।
चौहान झापा बिर्तामोड नगरपालिका-७ स्थायी घर भएकी हुन् भने सापकोटा बागलुङ नगरपालिका-५ का हुन् ।
उनीहरूबीच २०८१ वैशाख १ गते बिहे भएको थियो । बिहेपछि पतिसँग अष्ट्रेलिया गएकी चौहान केही महिनाअघि नेपाल आएकी थिइन् । सापकोटा भने अष्ट्रेलियामै छन् ।
सम्बन्ध विच्छेद गर्नुको कारणबारे उनले मुद्दामा उल्लेख गरेकी छिन् । उनले कलाकारिता क्षेत्रमा काम गर्ने भएकोले कार्यक्रमहरूमा सहभागी भएर कहिलेकाहीँ अबेरसम्म बस्नुपर्ने गरेको तर सापकोटाले कार्यक्रमको बीचैमा फोन गरेर घरमा आउन भन्दै बाधा पुर्याउने गरेको उल्लेख गरेकी छिन् । सोही विषयमा मनमुटाब हुन गएको र अष्ट्रेलिया गएको तीन महिनापछि आफू नेपाल फर्किएको चौहानले बताएकी छिन् ।
‘नेपाल फर्किएपछि पनि म कलाकारिता क्षेत्रमा हुने कार्यक्रममा व्यस्त हुँदा उनले मेरो चरित्रमाथि शङ्का-उपशंकाको दृष्टिले अनेक लाञ्छना लगाउँदा मलाई मानसिक कष्ट भयो,’ उनले भनेकी छिन् ।
यस्तो खालको प्रवृत्तिका कारण दुईबीचको वैवाहिक सम्बन्ध सुमधुर रहेर अगाडि बढ्न नसक्ने देखेर आफूले मुद्दा दायर गरेको उनले उल्लेख गरेकी छिन् ।
‘म फिरादी र विपक्षी पतिबीच भावनात्मक रूपमा सुमधुर सम्बन्ध कहिल्यै हुन नसकी कागजी रूपमा मात्र रहेको पति-पत्नीको सम्बन्धमा रहनु भन्दा,’ चौहानले मुद्दामा लेखेकी छिन्, ‘सम्बन्ध विच्छेद गरी स्वतन्त्र भई आ-आफ्नो जीवन बिताउन श्रेयस्कर लागेकाले अदालतमा उपस्थित भएकी छु ।’
चौहानले सम्बन्ध विच्छेद गरे पनि पतिसँग अंश, माना-चामल नलिने निर्णय गरेको बताएकी छन् ।
‘निज विपक्षीबाट अंश तथा माना–चामल नलिने गरी यो फिरादपत्र लिई सम्मानित अदालतसमक्ष उपस्थित भएकी छु,’ चौहानले उल्लेख गरेकी छन् ।
