‘ममी’को प्रिमियरमा बोल्न नपाएपछि सुलक्षण भारतीको नाटक !
काठमाडौं । माघ २५ गते भोली शुक्रबारदेखि प्रदर्शनमा आउने चलचित्र ‘ममी’को बुधबार साँझ काठमाडौंमाको सुन्धरा स्थित क्यूएफएक्सको सिभिल हलमा बुधवार प्रिमियर शो आयाेजना गरिएको थियो ।
करिब चार सय आगन्तुक रहेको प्रिमियरमा अप्रत्याशित नाटकीय मोड आयो, त्यो कसैले कल्पना नै गरेको थिएन! जसलाई जो केही उपस्थित चलचित्रका ‘कास्ट एन्ड क्रिउ’ देखि सिनेक्षेत्रका व्यक्तित्वहरूले भुल्ने छैनन् ।
चलचित्रका मुख्य अभिनेता सुलक्षण भारती रिसाउँदै हलबाट बाहिरिएका थिए, जसले शो नै रोक्नुपर्ने अवस्था सिर्जना गर्यो! घटना यति नाटकीय बन्यो कि उपस्थित व्यक्तित्वहरू चकित परे। सुरूमा चलचित्रका निर्देशकले आफ्नो भनाइ राखे, त्यसपछि अभिनेत्री प्रियंका कार्की र दिया मास्केले माइक समाते । तर जब अभिनेता सुलक्षणको पालो आउनुपर्ने थियो, उद्घोषकले चलचित्र सुरु गरिदिइन् । सुलक्षण भने स्टेजमा बोल्न नपाएको कुराले असन्तुष्ट बने ।
जब सुलक्षणले हल छाडेर बाहिरिने संकेत दिए, निर्माण टिम तनावमा आयो । चलचित्र त सुरु भइसकेको थियो, तर मुख्य अभिनेताकै असन्तुष्टिले सबैलाई स्तब्ध बनायो । तत्कालै प्रिमियर रोकेर निर्माण टिमले सुलक्षणलाई फकाउनुपर्यो ।
चलचित्रकी मुख्य अभिनेत्री रहेको प्रियांका कार्की भने सुचारु भइसकेको सिनेमा यसरी रोकिँदा चिढिइन्। उनले सुचारु भएको फिल्म किन रोकेको भन्दै टिमका अन्य सदस्यहरू साधिखोजी गरिन् ।
प्रियांकाले टिमलाई सोधिन्, “फिल्म अलरेडी सुरु भइसक्यो, फेरि किन रोक्ने?” जब उनलाई सुलक्षण असन्तुष्ट रहेको थाहा भयो, तब उनले नै टिमलाई फकाउन पठाइन् ।
टिमका सदस्यलाई प्रियांका भन्दै थिइन्, ‘जाऊ फकाउ यस्तो समयमा किन असन्तुष्टि देखिनु पर्यो, यहाँ उपस्थितलाई करद गर्ने समय हो ।’ टिमका सदस्य को फकाउन जाने भन्नेमै दोधारमा परे, पछि एक सदस्य गएर मनाएपछि सुलक्षण करिब १० समयपछि मात्रै हलभित्र पसे ।
हलमा फर्किएपछि उनले केही कम्पनीको नाम लिन बाँकी रहेको कारण देखाए । यद्यपि, उनको शरीरभाषाले स्पष्ट पार्थ्यो कि उनी गहिरो असन्तुष्ट थिए ।
प्रिमियर शोमा उपस्थित एक सिनेकर्मी भन्छन् – सुलक्षणले आफ्नो ‘स्टारडम’ स्थापित गर्न चाहेका थिए, तर प्रिमियरमा उनलाई नजरअन्दाज गरिएपछि उनले ‘स्टेटमेन्ट’ दिन खोजे । अर्को तर्फ, आयोजक टिमले भने ‘समय अभावका कारण सुलक्षणलाई पछि बोल्न दिएको’ भनेर आफूलाई बचाउने प्रयास गर्यो ।
जेहोस्, ‘ममी’ को प्रिमियरमा सुलक्षण भारतीको यो नाटकीय ‘ड्रामा’ ले चर्चा त पक्कै बटुल्यो !
चलचित्र हेरेपछि उपस्थित सिनेक्षेत्रका व्यक्तित्वहरूले यो चलचित्र नेपाली हरर चलचित्रको लागि माइलस्टोन हुनसक्ने प्रतिक्रिया दिए । अब हेर्न बाँकी छ, ‘ममी’लाई दर्शकले कसरी लिन्छन्?
चलचित्र हेरेपछि प्रतिक्रिया दिनेहरु भिडियोमा:
