स्वेता खड्काले चलचित्र उद्योगलाई टाटा बाईबाई गरेकी हुन् र ?
काठमाडौं । नायिका स्वेता खड्का नेपाली रजतपटमा नदेखिएको कति भयो ? थुप्रै भइसक्यो । दुईचार वर्ष यताबाट मात्रै नेपाली चलचित्र हेर्न थालेका दर्शकलाई त स्वेताबारे थाहा नहुन पनि सक्छ ।
किनकी उनले चलचित्र खेल्न छोडेकै लामो समय भइसक्यो । विसं २०७४ फागुन ४ गते उनले निर्माण तथा अभिनय गरेको चलचित्र ‘कान्छी’ रिलिज भएको थियो । त्यसयता उनले चलचित्रमा काम गरेकी छैनन् ।
हालका लागि यही नै उनको अन्तिम चलचित्र हो । यो चलचित्रले सोचेजस्तो व्यापार गरेन ।
सात वर्षदेखि उनी करिबकरिब नेपाली चलचित्र उद्योगबाट टाढा छिन् भन्दा हुन्छ । त्यसअघि श्रीकृष्ण श्रेष्ठ र उनको चलचित्र ‘कोहिनुर’ रिलिज भएको थियो । यो भने त्यबेलासम्मको सर्वकालीक ब्लकबस्टर चलचित्र हो । करिब ११ करोड रुपैयाँ कमाएको थियो ।
त्यसपछि स्वेता समाज सेवामा लागिन् । बिजनेसलाई विस्तार गरिन् । नयाँ सम्बन्ध स्थापित र व्यवस्थित गरिन् । माझी बस्ती बसाइन् । तर उनले सिनेमा भने बनाइनन् । अभिनय पनि गरिनन् । चलचित्रका कार्यक्रममा पनि हम्मेसी स्वेता देखिन्नन् ।
सिनेमाभन्दा पनि उनको रुचि बरु राजनीतिमा देखियो । स्वेता अबिर लगाएरै औपचारिक रूपमा नेपाली कांग्रेसमा प्रवेश गरिन् । शेरबहादुर देउवाले उनलाई कांग्रेस प्रवेश गराए । भुवन केसीसँगै उनी कांग्रेस प्रवेश गरेकी थिइन् । सँगै प्रवेश गरेका भुवन कांग्रेसकै सिफारिसमा चलचित्र विकास बोर्डको अध्यक्ष पनि बने ।
एक वर्ष अगाडि स्वेता श्रीमान् र छोरीसहित नेकपा एमाले अध्यक्ष केपी ओली निवास बालकोट पुगिन् । उनी आफैँले ओलीले आफ्नी छोरीलाई बोकेको र छेउछेउमा श्रीमान् र आफू बसेको तस्बिर सामाजिक सञ्जालमा पोस्ट गरिन् ।
स्वेताले आर्शिवाद लिन ओलीकोमा पुगेको बताएकी थिइन् ।
उनी बेलाबेलामा शीर्ष नेताहरूसँगका तस्बिर सामाजिक सञ्जालमा राख्छिन् । यसले स्वेताको लगाव सिनेमा निर्माण र अभिनयभन्दा पनि राजनीतिमा त छैन भन्ने शंका गर्ने ठाउँ दिन्छ ।
तर, बच्चा सानो भएकाले चलचित्रको कामबाट केही समय बिश्राम लिएकी हुन् अथवा सधैँका लागि टाटा बाईबाई गरेकी हुन्, यो भने स्पष्ट भइसकेको छैन ।
स्वेताले सन् २००८ बाट चलचित्रमा काम गर्न सुरु गरकी थिइन् । ‘कहाँ भेटिएला’बाट काम सुरु गरेकी उनले ‘हाँसिदेउ एक फेर’ र ‘श्रीमान् श्रीमती’मा पनि काम गरेकी थिइन् ।’
अब भने उनको अभिनय दर्शकले हेर्न पाउँछन् वा पाउँदैनन्, त्यो प्रतिक्षाकै विषय छ ।
