गायिका एलिना चौहान भन्छिन्- ‘धोकेबाज शब्द सुन्दा आफैँलाई भने झैँ लाग्छ’
काठमाडौं । चर्चित गायिका एलिना चौहान केही दिनयता आफ्नो वैवाहिक सम्बन्धविच्छेदको कुरालाई लिएर चर्चामा छिन् । उनले श्रीमान् विष्णु सापकोटासँग पारस्परिक सहमतिमा अलग्गिने निर्णय भएको खुलासा गरेकी थिइन्।
एलिनाले विवाहको पहिलो वार्षिकोत्सव मनाउन नपाउँदै सम्बन्धविच्छेदका लागि मुद्दा दायर गरेकी छन् । उनले गतसाता मात्रै श्रीमान् सापकोटासँग डिभोर्सका लागि काठमाडौं जिल्ला अदालतमा मुद्दा दायर गरेकी हुन् ।
अदालतमा सम्बन्धविच्छेदको मुद्दा दायर गरेपछि गायिका चौहानले सामाजिक सञ्जाल फेसबुकमा एक भिडियो सार्वजनिक गर्दै यस विषयमा आफूहरूले सल्लाह गरेरै छुट्टिने निर्णय गरेको बताएकी छन् ।
सम्बन्धविच्छेदको चर्चा चलिरहँदा पनि एलिनाले आफ्नो सांगीतिक यात्रालाई निरन्तरता दिएकी छन् । एलिना चौहान आफ्नो लोकप्रिय गीत ‘धोकेबाज हौ तिमी’ मार्फत नेपाली संगीत क्षेत्रमा स्थापित भएकी गायिका हुन् । यही गीतका कारण उनी देश तथा विदेशमा चर्चित भइन् । तर, पछिल्लो समय उनले यही गीत दोहोर्याएर गाउन मन नलागेको बताएकी छन् । जुन कुराको उनले शुक्रबार प्रस्तुति दिने क्रममा अभिव्क्त गरिन् ।
गायिका चौहानले आफूलाई धोकेबाज भनेर बोलाउन थालेको बताएकी छन् । शुक्रबार ह्वाइट हाउस लिटरेचर फेस्टिभलमा प्रस्तुति दिने क्रममा चौहानले आफूलाई ‘धोकेबाज’ गीत गाउन अनुरोध आएपछि त्यसबारे प्रतिक्रिया दिएकी थिइन् ।
प्रस्तुति दिनुअघि विद्यार्थी दर्शकले धोकेबाज गीत गाउन अनुरोध गर्दा उनले उक्त कुरा बताइन् ।
‘धोकेबाज मलाई भनेको कि गीत? अहिले त धोकेबाज शब्द सुन्दा पनि मलाई नै भनेको जस्तो लाग्छ,’ उनले भनिन् । दर्शकले धोकेबाज गीत वान्समोरभन्दा धेरैको प्रेममा धोका भएको छ कि भन्दै प्रश्न गरेकी थिइन् । उनले यो पढ्ने बेला भएकाले प्रेममा नपर्न सुझाएकी थिइन् ।
यस्तै उनले आफूलाई अहिलेको अवस्थामा धोकेबाज गीत धेरै गाउन मन नभएको बताइन् । ‘भर्खंर भर्खंर ब्रेकअप भएको छ । यस्तो बेला धेरैपटक धोकेबाज गाउनु हुँदैन । मलाई धोकेबाज धेरै गाउने मुड छैन,’ उनले भनिन् । त्यसपछि उनले के माया लाउछ र गीत गाएकी थिइन् ।
यसका साथै उनले तिम्रो मायाले बाँधेर राख, धोकेबाज हौं तिमि, कट्टा हान्दिन्छु, रक्सी चुरोट छाड्न पाउन्नौं, दुश्मन हेरेको हेरेई, मिनरल वाटरलगायत आधिदर्जन गीत गाएकी थिइन् ।
यता, गायिका चौहान स्टेजमा गाउँदै गर्दा भक्कानिएको एक भिडियो क्लिप भाइरल भएपछि अभिनेत्री ऋचा शर्माले साहसी महिला भएको भन्दै उनको आँटलाई सलाम गरेकी छन् ।
उक्त भिडियो फेसबुकमा पोस्ट गर्दै ऋचाले एलिनाको वैवाहिक सम्बन्ध र उनको संगीतको प्रशंसा गरेकी हुन् ।
उनले लेखेकी छन्- ‘तिम्रो आँटलाई म सलाम गर्छु। धेरै महिलाहरू समाजको डरले आफूलाई बिर्सेर अरूको चाहनामा बाँच्न बाध्य हुन्छन् । तर तिमीले आफूलाई चुन्यौ, आफ्ना सपनालाई चुन्यौ। संगीत तिम्रो आत्मा हो, र तिमीले त्यसैलाई अँगाल्यौ । तिमीले जस्तो निर्णय लियौ, त्यसले तिमीलाई अझ बलियो बनाओस्। तिम्रो स्वर, तिम्रो संगीत संसारभरि गुन्जिरहोस्। यदि कहिल्यै थाक्यौ भने, सम्झनू तिमी एक यस्ती साहसी आत्मा हौ जसले परम्परागत सिमानाहरू तोडेर आफ्नो बाटो आफैँ कोरिन् । तिम्रो साथमा, ऋचा शर्मा ।’
यस्तै, अभिनेत्री शर्माले गायिका चौहानको आटलाई सलाम गर्दै उनको निर्णयले अझ बलियो बनाउन र स्वर र संगीत संसारभरि गुञ्जिरहोस भन्दै शुभकामना पनि दिएकी छन् ।
