‘अच्छा लेकिन लण्डनको चिसोले समाउला’को नयाँ भर्सनले पुरानो शाख जोगाउला ?
काठमाडौं । नेपाली सिनेमा इतिहासमा चर्चित गीतमध्ये एक हो, ‘अच्छा लेकिन लण्डनको चिसोले समाउला’ । यो गीत २०४९ सालमा प्रदर्शनमा आएको चलचित्र ‘दैव संजोग’मा समावेश थियो, जसले नेपाली संगीतप्रेमीको मन जित्न सफल भएको थियो ।
शम्भुजित बाँस्कोटाको संगीत तथा शब्द रहेको यो गीत अहिले नयाँ पुस्ताका दर्शकलाई लक्षित गर्दै पुनः रिलिज गर्न लागिएको छ । अभिनेता राजेश हमालको कमब्याक चलचित्र ‘नरसिंहाः अवतार’ मा यो गीतको नयाँ भर्सन समावेश गरिएको छ ।
कालजयी धुनमध्ये एक ‘अच्छा लेकिन लण्डनको चिसोले समाउला’ यो गीतलाई अहिले चैतको २९ गतेबाट रिलिजमा आउन लागेको दिवाकर भट्टराईको निर्देशनमा निर्माण भइरहेको चलचित्रका लागि भिडियो छायांकनसमेत सम्पन्न भइसकेको छ ।
यो गीतका संगीतकार शम्भुजित बाँस्कोटाले नयाँ पुस्ताका दर्शकलाई लक्षित गर्दै यसको रिमेक भर्सन तयार पारेका छन् । पुरानो संस्करणमा शम्भुजित बाँस्कोटा, देविका बन्दना र सुदेश शर्माको स्वर थियो भने नयाँ संस्करणमा शम्भुजितसँगै चर्चित गायिका रचना रिमालले स्वर दिएकी छन् ।
पुनः दर्शकमाझ आउने भएको यो गीतको संगीत संयोजनमा केही नयाँ प्रयोग गरिए पनि मौलिक पक्षलाई यथावत राखिएको निर्माण पक्षको भनाइ छ ।
नयाँ भर्सनको भिडियो काठमाडौंको जरसिंह पौवामा भव्य सेट निर्माण गरी छायांकन गरिएको छ । चार दिन लगाएर खिचिएको भिडियोमा सिनेमाका मुख्य कलाकार राजेश हमाल, सरोज खनाल, नीति शाह, राज कटुवाल, उषा खड्गी र सनिशा भट्टराईले नृत्य गरेका छन् ।
कविराज गहतराजले नयाँ भर्सनको भिडियोलाई कोरियोग्राफी गरेका छन् भने यो गीत भिडियोको निर्माणमा मात्र १५ लाख रुपैयाँ खर्च भएको निर्देशक दिवाकर भट्टराईले जानकारी गराएका छन् ।
‘नरसिंहाः अवतार’ मार्फत उनी ८ वर्षपछि ठूलो पर्दामा फर्कन लागेका छन् । ‘अच्छा लेकिन लण्डनको चिसोले समाउला’ आफू अभिनीत चलचित्र समावेश हुँदा अभिनेता हमालले यो गीतले आफूलाई फेरि विगतमा फर्काएको भन्दै दर्शकले मन पराउने विश्वास व्यक्त गरेका छन् । यसैगरि, निर्देशक भट्टराई यो गीतको नयाँ भर्सन चलचित्रमा समावेश गराउन पाउँदा भाग्यमानी महसुस गरेका छन् ।
पुरानो पुस्ताका दर्शकका लागि यो गीत सम्झनाको संगालो हो भने नयाँ पुस्ताका लागि नयाँ स्वादमा पुरानो गीत सुन्ने अवसर । कतिपय अवस्थामा दर्शकले पुरानो मौलिकतालाई बढी मन पराउने गरेका छन् भने कतिपय नयाँ भर्सनले समेत उस्तै लोकप्रियता पाउने गरेका छन् ।
निर्माण टिमले ‘अच्छा लेकिन लण्डनको चिसोले समाउला’ को नयाँ भर्सनले पुरानो गीतको लोकप्रियता पुनः कायम गर्ने विश्वास लिएको छ ।
‘अच्छा लेकिन लण्डनको चिसोले समाउला’ को नयाँ भर्सनले पुरानो जस्तै प्रभाव जमाउन सक्छ या सक्दैन भन्ने विषयमा दर्शकको प्रतिक्रिया महत्वपूर्ण रहनेछ । पुरानो गीतले जुन ख्याति कमायो, त्यो नयाँ भर्सनले पनि कायम राख्नेछ, त्यो भने हेर्न बाँकी छ ।
नयाँ भर्सन दर्शकलाई पुरानै झल्को दिन्छ वा नयाँपनले उनीहरूलाई आकर्षित गर्छ ? यसैले, नयाँ पुस्ताका दर्शक तथा पुराना संगीतप्रेमीहरूमा पुरानो संझना दिलाएर नयाँ प्रस्तुति कत्तिको मन जित्छ, त्यो भने गीत रिलिजपछि नै थाहा हुनेछ ।
