चलचित्र निर्माणमा गायक रामकृष्ण ढकाल
काठमाडौं । गायन क्षेत्रमा आफ्नै छुट्टै पहिचान बनाइसकेका लोकप्रिय गायक रामकृष्ण ढकाल अब चलचित्र निर्माणको नयाँ यात्रामा अघि बढ्ने भएका छन् ।
छोरी रानी ढकालको नाममा स्थापना गरिएको रानी म्युजिक इन्टरनेशनल प्रा.लि.को ब्यानरमा उनले ‘मालती मंगले’ नामक चलचित्र निर्माण गर्न लागेका हुन् ।
गायक ढकालले निर्माण गर्न लागेको चलचित्र ‘मालती मंगले’ हालै चलचित्र विकास बोर्डमा दर्ता गरेका थिए । यस चलचित्रलाई प्रकु पाण्डे (प्रकाश)ले लेखन तथा निर्देशन गर्ने भएका छन् ।
१ करोड रुपैयाँ बजेट निर्माण तय गरिएको चलचित्रका कार्यकारी निर्माता सागर ज्ञवाली रहेका छन् ।
यसअघि गायक ढकालले चलचित्र ‘आशीर्वाद’मा अभिनय गरिसकेका छन् । गोपाल कर्माचार्यद्वारा निर्माण गरिएको सो सिनेमामा उनले आफ्नो जीवन यात्रासँग सम्बन्धित कथालाई पर्दामा उतारेका थिए । लामो समयपछि अब ढकाल निर्माताका रूपमा पुनः चलचित्र क्षेत्रमा फर्किन लागेका हुन् ।
चलचित्रको नाम ‘मालती मंगले’ दिइएपछि धेरैले यसलाई माधव घिमिरेको चर्चित काव्य ‘मालती मंगले’ संग सम्बन्धित हो कि? भन्ने कौतुहलता व्यक्त गरिरहेका छन् ।
निर्माण टिमले यो सिनेमाका कलाकार र प्राविधिकहरूको बारेमा अहिलेसम्म कुनै आधिकारिक जानकारी सार्वजनिक गरेको छैन । चलचित्रको छायांकन कहिले सुरु हुन्छ, कलाकार को-को हुनेछन्, र कथावस्तु के हुनेछ भन्ने बारे छिट्टै जानकारी दिइने जनाइएको छ ।
गायन क्षेत्रमा अपार सफल हासिल गरिसकेका ढकाल अब चलचित्र निर्माणको नयाँ यात्रामा निस्केका छन् । उनका ४ हजार भन्दा धेरै गीतहरूले नेपाली संगीत उद्योगमा ऐतिहासिक योगदान पुर्याइसकेको छ । अब भने उनी निर्माताका रूपमा कत्तिको सफलता हात पार्छन् भन्ने हेर्न बाँकी छ ।
रामकृष्ण ढकालको ‘मालती मंगले’ फिल्मको औपचारिक घोषणा भएसँगै नेपाली चलचित्र उद्योगमा उत्साह थपिएको छ ।
