‘सोल्टिनी’को छायाकंन सम्पन्न, संविधान दिवसका दिन रिलिज हुने
काठमाडौं । अर्जुन सुवेदीको निर्देशनमा निर्माण भएको चलचित्र ‘सोल्टिनी’को छायाकंन सम्पन्न भएको छ ।
चलचित्रको इलाम बजार, बिब्ल्याटे, कन्याम, बिर्तामोड, पथरी र भोजपुरका विभिन्न स्थानमा गरि ३६ दिनमा छायाकंन पुरा भएको निर्माण पक्षले जानकारी गराएको छ ।
अभिनेता तथा गायक प्रकाश सपुत र अभिनेत्री परीक्षा लिम्बुको जोडी बाँधिएको यो चलचित्रले समाजमा विद्यमान अमानवीय र जातीय भेदभावलाई उजागर गर्दै यसविरुद्ध आवाज उठाउने कथा प्रस्तुत गर्ने सङ्केत गरेको छ । यो चलचित्रमा दुई प्रमुख पात्रबीचको प्रेमकथा पनि मुख्य आकर्षण हुने निर्माण पक्षको भनाइ छ ।
अन्तिम दृश्य भोजपुरको अन्नपूर्ण गाउँमा खिचिएको थियो, जसमा परीक्षा लिम्बु, सब्बु गुरुङ, कविता आले, सुजाता गुरुङ र प्रेम सुब्बाले अभिनय गरे ।
चलचित्रका निर्देशक सुवेदीले समयमै छायाङ्कन सकिनुको मुख्य कारण पूर्व तयारी रहेको बताए । “फिल्मको प्रत्येक दृश्यलाई सुन्दर बनाउन हामीले लोकेशनको राम्रो अध्ययन गरेका थियौँ । इलामदेखि भोजपुरसम्मका रमणीय स्थानहरूको चयनले कथालाई जीवन्त बनाएको छ,” उनले भने ।
निर्देशक सुवेदीले ‘सोल्टिनी’लाई दर्शकलाई फरक स्वाद दिने कथासँग जोड्न कुनै कसर बाँकी नराख्ने बताए ।
चलचित्रमा प्रकाश सपूत, विल्सन विक्रम राई, परीक्षा लिम्बु, सब्बु गुरुङ, रवीन्द्र झा, प्रकाश घिमिरे, प्रेम सुब्बा, कविता आले, सुन्दर धिताल, सुजन खतिवडालगायत चर्चित कलाकारको उपस्थिति रहेको छ । प्रकाश सपूत ‘भीमसेन पोखरेल’ र परीक्षा लिम्बु ‘दिलासा राई’को भूमिकामा देखिनेछन् ।
चलचित्रको सङ्गीत प्रशान्त सिवाकोटी र हर्कुलस बस्नेतले दिएका छन् भने छायाकंन सुशन प्रजापतिले गरेका हुन् ।
प्लानेट थ्री फिल्म्सको प्रस्तुति तथा नेपसिने र योलो इन्टरटेन्मेन्टको सहकार्यमा बनेको यो चलचित्रका निर्माता रेजिना बिस्ट र संसार चौलागाईँ हुन् ।
‘सोल्टिनी’ २०८२ सालको असोज ३ गते संविधान दिवसको अवसरमा रिलिज गर्ने लक्ष्य राखिएको छ ।
