नेपाली चलचित्रको व्यापारमा ‘खडेरी’, बक्सअफिसमा सुपरस्टारहरूकै सिनेमा फ्लप
काठमाडौं । पछिल्लो केही महिना नेपाली चलचित्र क्षेत्रका लागि उतार-चढावपूर्ण रह्यो । गत वर्षको सफल व्यावसायिक यात्रा पछ्याउँदै यस वर्ष पनि नेपाली चलचित्र उद्योगले ठूला आशा राखेको थियो ।
विशेष गरी असोजदेखि कात्तिकसम्म घरेलु बक्सअफिसमा नेपाली सिनेमाहरूले बम्पर व्यापार गरे । असोज र कात्तिकमा प्रदर्शन भएका ‘छक्का पन्जा ५’, ‘१२ गाउँ’, ‘पूर्णबहादुरको सारङ्गी’ले घरेलु बक्सअफिसमा निरन्तर व्यावसायिक सफलता हासिल गरे । जसबाट केही निर्माता-निर्देशक नयाँ सिनेमा निर्माणमा समेत हौसिए ।
मंसिरदेखि बक्सअफिस सुस्ताउँदो गतिमा छ । ‘ह्रस्व दीर्घ’ र ‘तेलभिसा’ले औसत व्यापार गरे पनि त्यसयताका कुनै पनि चलचित्र बक्सअफिसमा सफल हुन सकेका छैनन् । ‘अग्निदहन’, ‘देववाणि’, मिसिङ : केटी हराएको सूचना’, ‘एक्टर’, ‘बमबहादुर’, ‘फिरफिरे फिरिरी’, ‘कार्साङ’लगायत सिनेमा असफल भए ।
विशेषगरी, दयाहाङ र सौगातलाई ‘हिट मेकर’ मान्ने दर्शकसमेत उनीहरुका सिनेमाप्रति आकर्षित भएनन् । पौषदेखि माघ महिनासम्मको अवस्थाले भने नेपाली चलचित्र उद्योगलाई पुनः गम्भीर चिन्तामा पारिदिएको छ ।
माघ महिनामा मात्र सात चलचित्र रिलिज भए, तर तीमध्ये एउटा पनि सिनेमा व्यावसायिक रूपमा उकासिन सकेन । विशेषगरी ‘स्टारडम’ कहलिएका कलाकारहरू प्रदीप खड्का, दयाहाङ राई, सौगात मल्ल, प्रियंका कार्की र ऋचा शर्मा अभिनीत चलचित्रहरू समेत दर्शक तान्न असफल भए ।
माघ १८ गतेबाट प्रदर्शनमा आएको ‘एक्टर: टेक वान’ प्रदीप खड्काको चलचित्र भएकाले धेरैको आशा थियो । तर, प्रदीपले पनि स्टारडमको जादू देखाउन सकेनन् । नाम विवादका कारण कानुनी झमेलामा परेसँगै तोकिएको मिति (माघ १६) भन्दा दुई दिनपछि मात्र ‘एक्टर: टेक वान’ प्रदर्शनमा आउन सक्यो । दुई दिन पर धकेलिए रिलिज भएको सिनेमाको ओपनिङ नै कमजोर रह्यो । पहिलो दिन नै धेरै शो क्यान्सिल भए भने दोस्रो दिन व्यापार अलि माथि उठे पनि त्यसपछिका दिनहरूमा यो चलचित्र उकासिन सकेन ।
प्रदीपलाई ‘सुपरस्टार’को रूपमा प्रचार गरिएको भए पनि ‘एक्टर’ को व्यापारले उनको स्टारडमलाई थप प्रश्न चिन्ह खडा गरिदिएको छ । तथापि, प्रदीपले चलचित्र प्रचारका लागि गरेको दौडधुप भने तारिफयोग्य थियो । तर, बक्सअफिस रिपोर्टअनुसार निर्माताले हलबाट ५० लाख रुपैयाँ सेयर रकम समेत नपाउने सम्भावना छ ।
प्रदीपको ‘एक्टर : टेक वान’ मात्र होइन, सौगात मल्ल अभिनीत ‘बमबहादुर’, दयाहाङ राई र जितु नेपाल अभिनीत ‘कार्साङ’ पनि फ्लप भएसँगै यी कलाकारहरूको स्टारडम पनि फेरि एकपटक पुनर्विचार गर्नुपर्ने स्थिति देखिएको छ ।
यसैगरी, प्रियंका कार्की अभिनीत ‘ममी’को प्रचार अत्यन्तै आक्रामक रूपमा गरिएको थियो । प्रियंका काठमाडौंका सडकमा भूत बनेर हिँडिन्, नृत्य गरेर दर्शकको ध्यान तान्ने प्रयास गरिन् । तर, उनको मेहनतले हलमा दर्शक ल्याउन सकेन ।
त्यस्तै, ऋचा शर्माले आफ्नो करिअरको ‘दोस्रो इनिङ’ को रूपमा व्याख्या गरेको चलचित्र ‘सारंग’ पनि दर्शक अभावकै कारण हलबाट हटिसकेको छ ।
माघमा रिलिज भएका सात चलचित्रमध्ये कुनै पनि सिनेमाले १ करोडको ग्रस कलेक्शन पार गर्न सकेनन् । ‘एक्टर’, ‘फिरफिरे फिरिरी’, ‘केटी हराएको सूचना’, ‘जुना’ लगायतका चलचित्रहरू फ्लप भए । ‘जुना’ त च्यारिटी शोमा दर्शक बेहोस हुने सिनेमा भनेर प्रचार गरिएको थियो । तर, ‘जुना’ हेर्न हलसम्म दर्शक पुगेनन् ।
दुई महिनाको अवधिमा दर्जनभन्दा बढी चलचित्र प्रदर्शनमा आए पनि कुनै पनि सिनेमाले बक्सअफिसमा उल्लेखनीय प्रभाव पार्न सकेन । सामाजिक सञ्जालमा जुन चलचित्रले चर्चा पाए पनि हलमा दर्शक ल्याउन सकेन । बक्सअफिसमा असफल हुँदा यी सिनेमाले लगानी उठाउन सकिरहेका छैनन् । लगानी रिकभर गर्ने त परको कुरा त्यसको सानो अंश पनि कलेक्सन गर्न सकिरहेका छैनन् । वितरकको पैसा पनि नउठेपछि वितरकलाई खल्तीबाट पैसा दिनुपर्ने अवस्थामा निर्माता छन् ।
चलचित्रको गुणस्तर कमजोर रहँदा प्रचार र विवादले मात्र व्यापार सुधार गर्न नसक्ने पुष्टि भएको छ । यसले गर्दा निर्माताहरू फेरि एकपटक सिनेमा निर्माणमा सोच्न बाध्य भएका छन् । यो वर्ष साढे दश महिनामा १५५ सिनेमा निर्माणका लागि चलचित्र विकास बोर्डमा इजाजत लिएको पाइएको छ ।
तर, पछिल्लो फ्लप लहरले निर्माता तथा निर्देशकलाई पुनः सोच्न बाध्य बनाएको छ । लगातार चलचित्रको व्यापार ओरालो लागेपछि निर्माता चलचित्र रिलिज गर्न डराइरहेका छन् । अब फागुन महिनामा मात्र १० भन्दा बढी नेपाली चलचित्र प्रदर्शन हुँदैछन् । यदि यी सिनेमाहरूले पनि बक्सअफिसमा राम्रो व्यापार गर्न सकेनन् भने नेपाली चलचित्र उद्योगमा पुनः खडेरीको अवस्था आउन सक्छ ।
गएका महिनाको कमजोर व्यापारपछि अब सबैको ध्यान फागुनमा रिलिज हुने १० वटा सिनेमामा केन्द्रित छ । के फागुनका चलचित्रले यो फ्लप लहरलाई तोड्न सक्लान् ? यो प्रश्नले अहिले सिंगो नेपाली चलचित्र उद्योगलाई सताइरहेको छ।
यसबीच, दर्शकले राम्रो फिल्मलाई मात्र स्वीकार्ने स्पष्ट संकेत दिएका छन् । गुणस्तरीय कथा, राम्रो निर्देशन र दर्शकलाई तान्ने खालका चलचित्र बनाउनु हो । स्टारडमलाई मात्र भर नपरी चलचित्रकै गुणस्तरमा ध्यान दिनुपर्ने बेला आएको देखिन्छ । आगामी चलचित्रहरूले नेपाली बक्सअफिसमा नयाँ ऊर्जा ल्याउँछन् कि माघ महिनाको जस्तै निराशाजनक परिणाम दोहोरिन्छ ? यो अबको प्रमुख चासोको विषय बनेको छ ।
