लहडमा चलचित्र नबनाऊ, रिसर्च गरेर बनाऊ
कात्तिकदेखि यता रिलिज भएका चलचित्रले बक्सअफिसमा खासै राम्रो व्यापार गर्न सकेका छैनन् । कात्तिकयता रिलिज भएका चलचित्रले लगानी उठाउन नसकिरहेको जगजाहेर नै छ ।
निर्माताको ठूलो रकम डुबिरहेको छ । वैशाखदेखि कात्तिकसम्म उत्साहजनक व्यापार देखिएको चलचित्र उद्योगमा त्यसयताका चलचित्रले निर्मातालाई निराश बनाइरहेका छन् ।
किन अधिकांश चलचित्रको व्यापार राम्रो भएन, के कारणले लगानी उठाउन सकेनन्, दर्शकले किन चलचित्र मन पराइरहेका छैनन् । यो महत्वपूर्ण प्रश्न हो ।
एकै जनराका चलचित्र मात्रै पनि रिलिज भइरहेका पनि छैनन् । फरकफरक जनराका चलचित्र आउँदा पनि दर्शकले हलसम्म जाने जाँगर देखाइरहेका छैनन् ।
नयाँ मेकर र कलाकारका चलचित्र आउन् वा पुराना र स्टार कहलिएका मेकर र कलाकारका चलचित्र आउन्, दर्शकले मन पराइरहेका छैनन् । यसले केही समय उत्साह थपेको नेपाली चलचित्रको बजार फेरि ओरालो लागेको छ ।
चल्छन् भनिएका चलचित्र नै के कारण चलेनन्, मन पराउँछन् भनिएका कथा नै मन पराइएन, विश्वास गरिएका भनिएका कलाकारप्रति नै किन दर्शकले किन अविश्वास गरे ? यी प्रश्नको जवाफ अब मेकर, वितरक र प्रदर्शकले एकसाथ खोज्नु पर्ने भएको छ ।
हलिउड, बलिउड होस् वा संसारका अरु ठूला उद्योग, एकाध चलचित्र मात्रै चल्छन् । यो सत्य हो । तर, यही नजिरलाई अगाडि सारेर बसिरहँदा सयौँ निर्माताको लगानी डुबिरहेको छ । यो क्षेत्रबाटै पलायन हुनुपर्ने अवस्था आएको छ ।
चलचित्र जुवा खेलेजस्तै हो भनेर बस्ने कि नेपाली दर्शकको टेस्ट कस्तो छ, कस्ता चलचित्र नेपाली दर्शकका लागि स्विटेबल हुन्छ, कस्ता विषय र प्रस्तुति मन पराउँछन् भने रिसर्च गर्नुपर्ने आवश्यकता देखिएको छ ।
नेपाली सिनेमाको बजार यसै पनि सानो छ । त्यसमा पनि सीमित एरियामा मात्रै सिनेमा हल छन् । त्यसैले रिसर्च गर्न धेरै समय, बजेट र जनशक्ति खर्चिरहनु पर्दैन । सरोकारवाला पक्षले यति गर्ने हो भने धेरैहदसम्म नेपाली सिनेमाका दर्शकको रुचि थाहा पाउन सकिन्छ ।
रुचि अनुसारको र दर्शकले खोजेअनुसारको विषय र प्रस्तुति भए केही हदसम्म भए पनि नेपाली चलचित्रप्रेमी दर्शक हलसम्म जाने सम्भावना बढ्छ । निर्माताको लगानी डुब्ने जोखिम कम हुन्छ ।
आधा सताब्दीभन्दा पनि लामो इतिहास बोकेको नेपाली चलचित्र उद्योगमा आजसम्म पनि चलचित्रलाई लिएर रिसर्च भएको छैन । यो सिनेमाप्रति र यसमा भइरहेको लगानीप्रतिको गम्भीरता नभएको परिणाम हो । यसले हचुवा र लहडका भरमा चलचित्र बनिरहेका छन्, लगानी भइरहेको छ भन्ने प्रष्ट पार्छ । परिणाम सबैसामु छँदै छ ।
त्यसैले सरकारी निकाय र सरोकारवाला निजी संस्थाले यसमा तत्काल ध्यान दिउन् । परिपक्व विस्तृत रिसर्च गरेर निर्माताको लगानीको जोखिम कम गरुन् ।
