झरनाको ‘ए मेरो हजुर ५’को मुख्य नायक पल कि प्रदीप ?
काठमाडौं । अभिनेत्री तथा निर्देशक झरना थापा हिट सिक्वेल ‘ए मेरो हजुर’को पाँचौं सिक्वेल ‘ए मेरो हजुर ५’ को तयारीमा जुटेकी छन् । लामो समयदेखि चलचित्रको स्क्रिप्टमा काम भइरहेको भए पनि अब उनले निर्माण प्रक्रियालाई तीव्रता दिने योजना बनाएकी छिन् ।
‘ए मेरो हजुर ५’ को छायांकन आउँदो भदौदेखि सुरु गर्ने तयारी रहेको बुझिएको छ ।
निर्देशक झरनाले गायक तथा संगीतकार खेम सेन्चुरीलाई संगीत संयोजनको जिम्मेवारी सुम्पेकी छन् । गत शनिबार निर्माता कम्पनी सुहाना इन्टरटेनमेन्टका लागि निर्माता सुनिल कुमार थापा र निर्देशक झरनासँग गायक सेन्चुरीले लिखित सहमति गरेका थिए ।
झरनाले यस चलचित्रमा आफ्नी छोरी तथा अभिनेत्री सुहाना थापालाई पुनः मुख्य भूमिकामा प्रस्तुत गर्ने तयारीमा छिन् । हाल सुहाना चलचित्र ‘परालको आगो’को छायांकनको तयारीमा जुटेकी छन् ।
नयाँ कथा लिएर आउन लागेको ‘ए मेरो हजुर ५’मा कलाकार छनोटको प्रक्रिया चलिरहेको छ । चलचित्रको प्रमुख नायक चयनको विषय अहिले चर्चाको विषय बनेको छ ।
कलाकारबारे निधो भइनसकेको बताइए पनि झरनाले यस चलचित्रका लागि नायक प्रदीप खड्कासँग विभिन्न चरणका छलफल गरिसकेकी छिन् । अर्कोतर्फ, नायकपल शाहलाई अनुबन्धित गर्ने तयारी समेत भइरहेको छ ।
झरनाले मुख्य नायकको भूमिकाको लागि नायक प्रदीप खड्कासँग विभिन्न चरणका छलफल गर्दै आएकी थिइन् । प्रदीपले ‘ए मेरो हजुर–५’का लागि आफूलाई अफर आएको यसअघि बताएका थिए ।
यसबीच, झरनाले पलसँग पनि छलफल गर्दै आएकी छन् ।
झरना र पलबीच चलचित्रको विषयमा छलफल भइसकेको र दुवै पक्ष सकारात्मक रहेको बुझिएको छ । पल पछिल्लो समय चलचित्र ‘मोहर’को छायांकनमा व्यस्त छन् भने अर्को चलचित्र ‘महाराजाधिराज’को छायांकनको तयारीमा पनि रहेका छन् ।
यदि, प्रदीप वा पल मध्ये कोही एक सुहानासँग पर्दामा देखिए यो जोडी नयाँ हुनेछ । ‘ए मेरो हजुर’ श्रृङ्खलाका अघिल्ला चलचित्रहरूले दर्शकको मन जितिसकेका कारण यसपटक पनि चलचित्रले राम्रो चर्चा पाउने निर्माणपक्षको विश्वास छ ।
अब झरनाले चलचित्रको औपचारिक घोषणा कहिले गर्ने भन्ने विषयमा सबैको चासो बढेको छ । उनले निर्देशन गरेको पछिल्लो चलचित्र ‘एक भागवत र एक गीता’ (सामाजिक कथा) थियो । यो चलचित्र भने बक्सअफिसमा असफल भएको थियो । त्यसैले उनी पुरानै लोकप्रिय सिनेमाको सिरिजमा पर्किएकी छन् ।
