चलचित्र निर्माणमा होमिएका बुद्धी तामाङको ‘कुस्ती’को छायाकंन सुरू
काठमाडौं । चलचित्र ‘कुस्ती’को छायाकंन सुरू भएको छ । कलाकार बुद्धी तामाङको पहिलो निर्माण रहेको यस सिनेमाको मंगलवार साँझ काठमाडौंको मातातीर्थमा मुहुर्त पूजा गर्दै औपचारिक रूपमा छायाकंन थालनी गरिएको हो ।
अनिल योञ्जनको निर्देशनमा निर्माण हुन लागेको चलचित्रको मुहुर्तमा अभिनेता धीरज मगर, पुस्कर गुरुङ र लुनिभा तुलाधर सहभागी भएका थिए ।
यस चलचित्रका लेखक समेत रहेका निर्देशक अनिलका अनुसार ‘कुस्ती’ सहरको कथा बोकेको प्रेमकथात्मक सिनेमा हो । “चलचित्रमा एक जोडीको प्रेम र तिनको सम्बन्धमा आउने उतारचढावलाई देखाइनेछ । उनीहरू एक अर्कालाई माया गर्छन्, तर आफ्नै स्वभावका कारण एकसाथ रहन कठिनाइको सामना गर्छन्,” निर्देशक भने ।
४५ दिनको सेड्युल बनाएर काठमाडौं र आसपासका क्षेत्रमा छायाङ्कन गरिने चलचित्रमा धीरज मगर, मिरुना मगर, बुद्धी तामाङ, दीकिला शेर्पा, रवीन्द्र झा, पुस्कर गुरुङ, राजाराम पौडेल, किरण केसी, लुनिभा तुलाधर, सूर्यमान लिम्बू, अरविन गुरुङ, रजनी गुरुङ, सुवर्ण थापा लगायतका कलाकारहरूको अभिनय रहनेछ ।
नयाँ भूमिकामा आउँदा उत्साहित र केही नर्भस रहेको बताउँदै बुद्धी तामाङले भने, “कलाकारितामा संकलन गरेको अनुभवलाई चलचित्र निर्माणमा उपयोग गर्ने अवसर पाएको छु । राम्रो कथा र उत्कृष्ट टीमका कारण निर्माताको रूपमा अगाडि आउन सफल भएको छु ।”
चलचित्रमा उमङ्ग शाहीको छायाङ्कन, मित्रदेव गुरुङको सम्पादन, दीपक शर्मा, अनिल योञ्जन, कल्याण सिंहको सङ्गीत तथा शिशिर खातीको नृत्य निर्देशन रहेको छ ।
काठमाडौं रीच इन्टरटेनमेन्ट, एप्पल इन्टरटेनमेन्ट तथा मोफसल एफडी कम्पनीले वितरणको जिम्मा लिएको चलचित्र आउँदो वर्ष २०८२ सालको भदौमा प्रदर्शनमा आउने तयारीमा छ ।
