दर्शकलाई अवमूल्यन गर्दा बिग्रिए चलचित्र
केही समय यता हाइप बनाएका र पुरानो ब्रान्ड भएका सिनेमाले नै राम्रो व्यापार गर्न सकेका छैनन् । कलात्मक र व्यापारिक रूपमा नै हाइप बनाएका र ब्रान्ड भ्यालु भएका चलचित्रले मार खाइरहेका छन् ।
समीक्षा राम्रो नपाए पनि व्यापारिक रूपमा सफल भए अथवा समीक्षा राम्रो पाएर व्यापारिक हिसाबले असफल भए पनि निर्मातालाई केही हदसम्म भए पनि चित्त बुझाउने ठाउँ हुन्छ । तर, यी दुवै पक्षमा चलचित्र असफल भएको खण्डमा निर्मातालाई चित्त बुझाउने ठाउँ हुँदैन ।
पछिल्लो समय यस्तै भइरहेको छ । चलचित्र कलात्मक रूपमा पनि कमजोर र व्यापारिक रूपमा पनि कमजोर भइरहेका छन् । रिलिज हुनुभन्दा अगाडि बजारमा राम्रो चर्चा कमाएका र प्रतिक्षित भनिएका चलचित्र नै असफल भइरहेका छन् ।
यसको कारण निर्देशक र लेखक हुन् । उनीहरू नै मुख्यरूपमा जिम्मेवार छन् । हामीले जे दियो त्यही नै राम्रो हो, दर्शक केही बुझ्दैनन् भन्ने चेतनाले निर्देशक र निर्माताले काम गर्दा चलचित्र बिग्रिरहेका छन् ।
दर्शकको चेतना क्षमतामा प्रश्न चिह्न खडा गर्दै उनीहरूको सिनेमा लिट्रेसीलाई नजरअन्दाज गर्ने निर्देशक र लेखकका कारण चलचित्र ब्रान्ड भए पनि र हाइप बनाए पनि सफल भइरहेका छैनन् ।
चलचित्र कस्तो हुन्छ, यसको संरचना, मनोरञ्जन र म्यासेज, अभिनय, तथा प्रस्तुति बुझ्ने दर्शक धेरै भइसके । तर, यही कुरालाई नजरअन्दाज गरेर हामी चलचित्र भनेर जे दिन्छौँ त्यही नै दर्शकले हेर्ने हो भन्ने मुर्खता निर्माता, लेखक र निर्देशकले गर्दा एकातिर चलचित्र कमजोर बनिरहेका छन् भने व्यापारिक रूपमा पनि फितलो बनिरहेका छन् ।
सिक्वेल बनाउने चक्कर र लोभमा पूरा कथा नभन्ने, चरित्रलाई पूर्णरूपमा स्थापित नगर्ने र बीचैमा कथा रोक्ने प्रवृत्तिकै रूपमा विकास भइरहेको छ । हरेक सिनेमा आफैँमा पूर्ण हुनुपर्छ । कथा जोड्न सकिन्छ भने मात्रै त्यसको सिक्वेल बनाउने हो ।
ओपन इन्डेड क्लाइमेक्स बनाउनु र कथा नसक्दै सिनेमा सक्नु भिन्न कुरा हो । तर, पछिल्लो समयका अर्को भागका लागि अथवा सिक्वेलका लागि पूरा कथा नभन्नुलाई नै ओपन इन्डेड क्लाइमेक्ससँग तुलना गर्दै सिनेमाको इन्डिङ गर्ने गरेको देखिएको छ ।
टेलिसिरयल र सिनेमा भिन्न कुरा हुन् । हरेक सिनेमा आफैँमा पूर्ण हुनुपर्छ, पुस्तकजस्तै । पुस्तकको अर्को सिक्वेल आउँछ भनेर बीचमै किताब टुंगिन्छ ? टुंगिदैन । त्यस्तै हो चलचित्र पनि । यसलाई चलचित्रका निर्देशक, निर्माता र लेखकले बुझ्नुपर्छ ।
त्यसैले सिक्वेल बनाउने रहरमा सिनेमा बिगार्ने काम नगरौँ । दर्शक भड्काउने काम नगरौँ । दर्शक हामीजत्तिकै बुझ्ने भइसके अथवा हामीभन्दा पनि बुझ्ने भइसके भन्ने सोचेर चलचित्र बनाउँ, धेरै हदसम्म समस्याको समाधान हुन यहीँबाट सुरु हुन्छ ।
