गायक तथा संगीतकार राईको निधन
काठमाडौं । गायक तथा संगीतकार विक्रम राइको निधन भएको छ । खोटाङ घर भएका राईको हृदयाघातका कारण शुक्रवार राति निधन भएको हो ।
पहिलो नेपाल आइडलसमेत रहेका राई सुतेकै ठाउँमा अचानक सास फेर्न छाडेपछि परिवारले प्रहरीलाई खबर गरेको थियो । प्रहरीले काठमाडौं, मोडेल अस्पताल बागबजार पुर्याउनसाथ डाक्टरले मृत घोषित गरेको थियो ।
राईले नेपाल आइडलको उपाधि जित्दा फ्रेन्चाइज नेपाल आइडल आइसकेको थिएन । उनका थुप्रै गीत चर्चित छन् ।
‘हौवा हौ दर्शन नमस्ते’, ‘तिम्ले बाटो फेर्यौ अरे’ २ र ३, ‘जीवनसाथी तिमीलाई छ मेरो सलाम’ (मेल भर्सन) लगायत चर्चित गीतहरूमा उनले संगीत गरेका हुन् ।
गायन र संगीत सिर्जनामा उत्तिकै दख्खल भएका विक्रमको निधनको खबर नेपाली सांगीतिक क्षेत्र स्तब्ध भएको छ । उनको निधनप्रति कलाकारहरूले सामाजिक सञ्जालमा श्रद्धाञ्जली व्यक्त गरिरहेका छन् ।
गायिका मेलिना राईले लेखेकी छन्, ‘जिन्दगी साँचै नै अप्रत्याशित रहेछ । यो अकल्पनीय घटनाले स्तब्ध बनाएको छ । आज हामी माझ एक कुशल गायक, सङ्गीतकार रहनुभएन विश्वास गर्न धेरै गाह्रो भएको छ हामी सबैलाई । शोकाकुल परिवारप्रति हार्दिक समवेदना व्यक्त गर्दछु, उहाँहरूलाई धैर्य धारण गर्न सक्ने क्षमता मिलोस् ।’
यस्तै गायक शिव परियारले गायक सङ्गीतकार विक्रम राईको अल्पायुमै भएको दुखद निधनले स्तब्ध बनाएको बताएका छन् ।
