दुर्गेश र ज्योतिको जुवारी, दुर्गेशको चेतावनी– हजुरहरू मेरो नाम काट्दै जानुस्, म मेरो नामको ब्रान्ड बनाउँदै जान्छु
काठमाडौं । ज्योति मगरलाई दुर्गेश थापालाई फेसबुकबाटै जवाफ फर्काएका छन् । ज्योतिले दुर्गेश दाङको कार्यक्रममा नगएको भन्दै हेलिकोप्टर चढेर कोही कलाकार आएको देखिएन त भनेपछि दुर्गेशले पनि फेसबुकबाटै जवाफ फर्काएका छन् । फेसबुकमै उनीहरूको जुवारी देखिएको छ ।
कार्यक्रम हुन नदिने खबर आएपछि आफू फर्किएको भन्दै दुर्गेशले फेसबुकमा लेख्दै कलाकारलाई राजनीति नगर्न सुझाएका छन् । राजनीति गर्नेलाई उनी राजनीति गर्दै गर्न तर आफू आफ्नो नामको ब्रान्ड बनाउँदै जाने बताएका छन् ।
“नेपालका मेलाहरूमा मेरो नाम काट्न लागिपरेका आदरणीय दिदी तथा मित्रहरू । हजुरहरू मेरो नाम काट्दै जानुस्, म मेरो नामको ब्रान्ड बनाउँदै जान्छु,” उनले लेखेका छन्, “दर्शकको अपार माया, हजारौँको भीड, अनगिन्ती अवसरहरू, यी सबै देखेर जल्नेहरू जल्दै रहुन् ।”
अचानक महोत्सव हुन नदिने निर्णयको खबर फैलिएकाले महोत्सव स्थलसम्म पुगेर निराश हुँदै फर्किएको देख्दा मन रोएको दुर्गेशले बताएका छन् ।
“केही कलाकारहरूको स्वार्थी सोच, राजनीतिक चलखेल र नियोजित रणनीतिले मलाई हजुरहरू माझ उपस्थित हुन दिएन । यो घटनाले एकचोटी फेरि स्पष्ट गरिदियो, केही व्यक्तिहरू कलाकारिताभन्दा बढी राजनीतिक स्वार्थमा लिप्त छन् । कोही कलाकारले हेलिकप्टर उड्यो कि उडेन भनेर लेख्न भ्याउनु भएछ,” उनले लेखेका छन्, “उहाँलाई मेरो बधाई ! मेरो कार्यक्रम रोक्न सफल हुनुभयो । हजुरको रणनीति साँच्चै गज्जबको रहेछ ।’
कार्यक्रम रोक्न सफल भए पनि दर्शकको माया रोक्न कसैले नसक्ने उनले बताएका छन् ।
“तर एक कुरा नबिर्सनुहोस्, हजुरहरूले मलाई कार्यक्रममा रोक्न सफल हुनुभयो होला । तर दाङका दर्शकहरूको मेरो लागि रहेको माया, स्नेह र आशीर्वाद कुनै माइकलालले मेटाउन सक्दैन,” उनी लेख्छन्, “मलाई हेलिकप्टर चढ्ने या देखाउने रहर छैन । मेरो मात्र एउटा रहर छ— नेपालका हरेक कुनामा पुगेर आफ्ना दर्शकहरूसँग भेट्नु, माया साट्नु, र आफ्नो प्रस्तुति दिनु । नेपालका मेलाहरूमा मेरो नाम काट्न लागिपरेका आदरणीय दिदी तथा मित्रहरू, हजुरहरू मेरो नाम काट्दै जानुस्, म मेरो नामको ब्रान्ड बनाउँदै जान्छु ।”
दर्शकको अपार माया, हजारौंको भीड, अनगिन्ती अवसरहरू देखेर जल्नेहरू जल्दै रहुन् भन्दै उनी लेख्छन्, “जबसम्म मेरो शीरमा दर्शकको आशीर्वाद छ । जबसम्म मेरो लागि दर्शकको माया छ । तबसम्म मलाई कसैले हल्लाउन सक्दैन ।”
दुश्मनहरूलाई एक मात्र जवाफ भनदे उनले लेखेका छन्, “दुर्गेश थापा नाम हैन ब्राण्ड हो ब्राण्ड ।”
हिजो ज्योतिले फेसबुकमा दुर्गेशलाई व्यङ्ग्य गरेकी थिइन् । ‘आज दाङको तुलसीपुर महोत्सवमा चर्चित कलाकार दुर्गेश थापा भाइको हेलिकोप्टर उड्यो कि उडेन ?’ उनले लेखेकी थिइन्, ‘हल्लाखल्ला सुनियन त । कतै कमेन्ट् मा खबर गरुम् त दंगाली सञ्चार माध्यमहरु । दुस्मन हेरेको हेरै होइन दुस्मन पर्खेको पर्खै थिय रे भन्ने हल्ला पो आयो त कता कता ।’
