बोर्डको सह्राहनीय सक्रियता
चलचित्र क्षेत्रको विकासका लागि सबैभन्दा ठूलो हात राज्यको हुन्छ । यसको अर्थ सरकार आफैँले चलचित्र बनाउनुपर्छ भन्ने होइन ।
यदि, सरकारले नै चलचित्र बनाउन थाल्यो भने त्यो भन्दा बेकुफी केही हुन्न । तानाशाह भएको देशमा मात्रै हो, राज्यले आफैँ सिनेमा बनाउने ।
यसको उदाहरणका लागि अन्य देश चाहरीरहनु नै पर्दैन । नेपालकै पञ्चायतकाल हेरे पुग्छ । शाही नेपाल चलचित्र संस्थान नामक संस्था दरबारले खडा गरेको थियो । उक्त संस्थानले पञ्चायत र दरबारको पक्षपोषण गर्दै सिनेमा बनाउँथ्यो ।
त्यो कालखण्डमा नेपाली चलचित्रले कति फड्को मार्यो भनिरहनु पर्दैन । नेपाली चलचित्रको इतिहास बुझेकालाई कण्ठस्थ छ । त्यसैले राज्यले सिनेमा बनाउनेतर्फ ‘लामो हात’ गर्नु हुँदैन । चलचित्र बनाउने जिम्मा निजी क्षेत्र र व्यक्तिलाई नै छोडिदिनुपर्छ ।
राज्यले सिनेमा निर्माणमा आउनेलाई सहजीकरण मात्र गर्ने हो । कसरी सिनेमा क्षेत्रलाई बलियो र अन्तर्राष्ट्रियकरण गर्न सकिन्छ भनेर चलचित्र उद्योगलाई बलियो बनाउन सहयोगी भूमिका मात्र राज्यले खेल्ने हो ।
यसका लागि सरकारले चलचित्रकर्मीका लागि सेमिनार, गोस्टी, स्क्रिप्ट लेखन, प्राविधिक पक्षको तालिम दिने हो । इनडोर, आउटडोर स्टुडियो बनाइदिने हो ।
विदेशी अनुभवी चलचित्रकर्मीसँगको भेट र अनुभव सेयर गराइदिनुपर्छ । छायांकन र सिनेमा निर्माणमा सकेसम्म अनुदान दिनुपर्छ । सेन्सरलाई सकेसम्म खुकुलो बनाएर सेल्फ सेन्सरसिपमा ध्यान दिन चलचित्रकर्मीलाई प्रोत्साहन दिनुपर्छ । करको दायरा खुकुलो गरिलिनुपर्छ ।
विश्वविद्यालयमा सिनेमा अध्ययनको व्यवस्था गरिदिनुपर्छ । विद्यालय तहदेखि नै यसको अध्ययनको व्यवस्था राज्यले मिलाइदिनुपर्छ । सर्वसुलभ अध्ययनका लागि छात्रवृत्तिको व्यवस्था गर्नुपर्छ ।
सरकारले नै अन्तर्राष्ट्रियस्तरको फिल्म फेस्टिभल नियमित आयोजना गर्नुपर्छ । जसले चलचित्रकर्मीलाई राज्यबाट हौसला मिल्नेछ । सिनेमा मेकिङप्रति चासो बढ्नेछ र ज्ञान अभिवृद्धि हुनेछ ।
यसो गर्न सके नेपाली चलचित्र उद्योगले चाँडै फड्को मार्नेछ । जसरी कोरियाली चलचित्र उद्योगले आफूलाई छोटो समयमै सिनेमाका विश्व बजारमा आफूलाई अग्रपंक्तिमा उभ्याइएको छ ।
पछिल्लो समय सानो सानो तहमा भए पनि सक्रिय चलचित्रकर्मीले प्रत्यक्ष लाभ लिने खालका काम चलचित्र विकास बोर्डले गरिरहेको छ ।
स्क्रिप्ट लेखन कार्याशाला, ड्रोन उडानको तालिम, सानो स्केलमा भए पनि मोफसलमा फेस्टिभल र सर्ट फिल्म मेकिङ प्रतिस्पर्धा, मेकअपलगायतका तालिम, कार्याशाला र गोष्टीहरू विकास बोर्डले गरिरहेको छ । जुन प्रशंसनीय छ ।
बजेट र जनशक्तिअनुसार बोर्डले देखाएको सक्रियता आफैँमा सम्मानलायक छ । यसलाई बोर्डले निरन्तरता दिँदै अझै ठूलो स्केलमा बढाउँदै जाने हो भने पक्कै पनि चलचित्रकर्मीले लाभ लिन सक्नेछन् ।
बोर्डले गर्नुपर्ने र यसबाट चलचित्रकर्मीका अपेक्षाका चाङ अग्लो होला । तर, जुन सक्रियता अहिले बोर्डले देखाएको छ, यसलाई सुरुवाती मानेर यसलाई गति दियो भने पक्कै भोलि चलचित्रकर्मीका लागि बोर्ड सारथी बन्नेछ ।
