१८ वर्षपछि सँगै देखिए शाहिद-करीना
काठमाडौं । बलिउडका चर्चित जोडीमध्ये एक शाहिद कपूर र करिना कपूर झण्डै १८ वर्षपछि एउटै मञ्चमा सँगै देखिएपछि उनका फ्यानहरू निकै उत्साहित भएका छन् । हालै सम्पन्न इन्टरनेशनल इण्डियन फिल्म एकेडेमी अवार्ड २०२५ (आईफा अवार्ड) को प्रेस सम्मेलनमा यी दुई स्टार एकसाथ स्टेजमा उपस्थित भए, जुन क्षण सामाजिक सञ्जालमा भाइरल भइरहेको छ ।
प्रेस सम्मेलनमा करण जोहर, कार्तिक आर्यन, कृति सेनन लगायत थुप्रै चर्चित कलाकारहरू उपस्थित भए पनि सबैको ध्यान शाहिद र करिनातर्फ मात्र केन्द्रित रह्यो । स्टेजमा एकअर्कासँग कुरा गरिरहेका शाहिद-करीना कार्यक्रम सकिएपछि अँगालो मार्दै मञ्चबाट ओर्लिएका थिए ।
जब शाहिद कपूरलाई करिनासँगको भेटबारे सोधियो, उनले मुस्कुराउँदै भने, “यो हाम्रो लागि नौलो होइन… हामी आज स्टेजमा भेट्यौं, जे भए पनि हामी धेरै पटक भेट्यौं । जनतालाई मन पर्यो भने राम्रो कुरा हो ।”
२००० को दशकमा बलिउडका चर्चित जोडीमध्ये एक मानिने शाहिद र करिनाले ‘फिदा’, ‘चुप चुप के’ र ‘जब वी मेट’ जस्ता सुपरहिट फिल्महरूमा काम गरेका थिए । विशेष गरी, ‘जब वी मेट’ मा उनीहरूको केमेस्ट्री दर्शकहरूले निकै रुचाएका थिए । तर, सोही फिल्मको सुटिङ सकिनुअघि नै उनीहरूको ब्रेकअप भएको थियो, जसले फ्यानहरूलाई ठूलो धक्का दिएको थियो ।
ब्रेकअपपछि करिना कपूरले सैफ अली खानसँग विवाह गरिन् र अहिले उनी दुई छोराकी आमा हुन् । त्यस्तै, शाहिद कपूरले मीरा राजपूतसँग विवाह गरेका छन् र दुई सन्तानका पिता बनेका छन् ।
यद्यपि, दुबै कलाकार आ-आफ्नो जीवनमा अगाडि बढिसकेका छन्, तर जब-जब उनीहरू सार्वजनिक रूपमा सँगै देखिन्छन्, फ्यानहरू पुराना दिनहरू सम्झन बाध्य हुन्छन् । यसपटक पनि १८ वर्षपछि शाहिद-करीना सँगै देखिएको दृश्यले बलिउड प्रेमीहरूलाई उत्साहित बनाएको छ ।
