आमिरकी प्रेमिका भनेर चर्चामा आएकी गौरी स्प्राट को हुन् ?
काठमाडौँ । बलिउड सुपरस्टार आमिर खान १४ मार्चबाट ६० वर्षका भए । आफ्नो ६०औं जन्मदिन मनाएका अभिनेता खान फेरि प्रेममा परेको बताएका छन् ।
आमिरले आफ्नो प्रि-बर्थडे सेलिब्रेशनमा प्रेमिकालाई सार्वजनिक गरेका छन् । तर, उनले प्रेमिकाको फोटो खिच्न दिन अस्वीकार गरे । यद्यपि, उनका तस्वीरहरु यतिबेला सामाजिक सञ्जालमा छ्यापछ्याप्ती देखिएका छन् ।
आमिरले आफ्ना दुई पूर्वपत्नीहरू, रीना दत्ता र किरण रावसँग राम्रो सम्बन्ध राख्छन् र सम्बन्ध विच्छेदपछि पनि परिवार जस्तै सम्बन्धमा रहेका छन् । बलिउडका मिस्टर परफेक्शनिस्टको छबि बनाएका अभिनेताले प्रि-बर्थडे पार्टीमा आफ्नो सम्बन्धको बारेमा खुलेर कुरा गरेका थिए ।
तेस्रो विवाहको तयारीमा देखिएका आमिरकी प्रेमिका गौरी स्प्राट को हुन् ? भनेर सञ्चारमाध्यममा चर्चा भइरहेको छ । प्रि-बर्थडे पार्टीमा आमिरले गौरीसँगको सम्बन्ध स्वीकार गर्दै २५ वर्षदेखि आफूहरुबीच चिनजान रहेको बताएका थिए ।
केही भारतीय सञ्चारमाध्यमका अनुसार आमिर र गौरी स्प्राटको रोमान्स केही वर्षअघि सुरु भएको थियो तर उनीहरुले एकअर्कालाई २५ वर्षदेखि चिनेका छन् ।
गौरी बेंगलुरुकी बासिन्दा हुन् र अहिले आमिर खानको फिल्ममा काम गरिरहेकी छिन् । उनी हेयरड्रेसिङमा व्यावसायिक पृष्ठभूमिबाट आएकी हुन् । उनले युनिभर्सिटी अफ आर्ट्स, लन्डनबाट फेसन, स्टाइलिङ र फोटोग्राफीमा एफडीए डिग्री लिएकी छिन् ।
गौरीको आमा तमिलियन र बुबा आयरिश हुन् र उनका हजुरबुवा स्वतन्त्रता सेनानी थिए । यसबाहेक उनी ६ वर्षको छोराकी आमा पनि हुन् । अर्थात् उनी पनि डिभोर्सी हुन् ।
आमिरसँग गौरीको सम्बन्ध निकै पुरानो छ । बलिउडको बारेमा धेरै थाहा नभए पनि बिस्तारै बुझ्दै छिन् । गौरीले आमिरका दुईवटा मात्र सिनेमा हेरेको बताइन्, ‘दंगल’ र ‘लगान’ ।
आमिरले यो पनि बताए कि उनको परिवारले गौरीलाई स्वागत गरेको र सबैले उनलाई मन पराउँछन् । हालै आमिरको घरमा एक निजी डिनरमा गौरीले बलिउड सुपरस्टार सलमान खान र शाहरुख खानलाई पनि भेटेकी थिइन् ।
आफ्नी प्रेमिकाको बारेमा थप जानकारी दिँदै आमिर खानले भने, ‘उनी बैंगलोरकी हुन् । वास्तवमा, हामी दुवैले एकअर्कालाई २५ वर्षदेखि चिन्छौं । तर हामी डेढ वर्षअघि मात्र भेटेका थियौं ।’ उनले अगाडी भने- ‘उनी कुनै कामको लागि मुम्बईमा थिइन् र हाम्रो अचानक भेट भयो । त्यसबेलादेखि, हामी एकअर्कासँग सम्पर्कमा रह्यौं र सबै कुरा त्यस्तै भयो, जस्तो प्रेममा परेपछि हुन्छ ।’
विवाहको प्रश्नमा आमिर खानले भने, ‘मलाई थाहा छैन, साठी वर्षको उमेरमा विवाह मलाई सुहाउँछ कि सुहाउँदैन । तर मेरा छोराछोरी खुसी छन् र म धेरै भाग्यमानी छु कि मेरा पूर्व पत्नीहरूसँग मेरो राम्रो सम्बन्ध छ ।’
आमिको पहिलो विवाह सन् १९८६ मा रीना दत्तसँग भएको थियो । यस विवाहबाट उनीहरुका सन्तान आयरा खान र जुनैद खान छन् । दुवैले सन् २००२ मा सम्बन्धविच्छेद गरेका थिए ।
यसपछि सन् २००५ मा आमिरले चलचित्र निर्माता किरण रावसँग विवाह गरे । तर, यो सम्बन्ध पनि लामो समय टिक्न सकेन र सन् २०२१ मा दुवै अलग भए । उनीहरुको एउटा छोरा आजाद राव छन्, जसको जन्म सरोगेसी मार्फत भएको थियो ।
