क्रिकेटर डेभिड वार्नरको चलचित्रमा इन्ट्री: तेलुगु सिनेमाबाट ‘डेब्यु’ गर्दै
काठमाडौँ । अस्ट्रेलियाका पूर्वक्रिकेटर डेभिड वार्नर भारतीय सिनेमामा प्रवेश गरेका छन् । क्रिकेट मैदानमा आफ्नो अद्भुत ब्याटिङ कौशल प्रदर्शन गरेका वार्नर अब तेलुगु सिनेमा ‘रोबिन हुड’ बाट अभिनय क्षेत्रमा डेब्यू गर्दै छन् । ३८ वर्षीय वार्नरले सामाजिक सञ्जालमार्फत आफ्नै डेब्यूको जानकारी सार्वजनिक गरेका हुन् ।
वार्नरले आफ्नो पोस्टमार्फत लेखेका छन्, “भारतीय सिनेमा, म आउँदैछु । सुटिङ गर्दा धेरै रमाइलो भयो । ‘रोबिन हुड’ को हिस्सा हुन पाउँदा म अत्यन्तै खुसी छु ।” उनको पोस्टपछि क्रिकेट र चलचित्र प्रेमी दर्शकहरू माझ उत्साह देखिएको छ ।
शनिवार चलचित्र निर्माण टिमले डेभिड वार्नरको विशेष पोस्टर सार्वजनिक गर्दै उनलाई स्वागत गरेका थिए । पोस्टरमा लेखिएको थियो, “बाउन्ड्रीदेखि बक्स अफिससम्म, डेभिड वार्नरलाई भारतीय सिनेमामा स्वागत छ ।”
चलचित्रमा मुख्य भूमिका निभाइरहेका चर्चित तेलुगु अभिनेता नितिनले पोस्टमा लेखेका छन्, “ब्याटिङदेखि सुटिङसम्म, क्रिकेट मैदानदेखि फिल्म क्षेत्रसम्म, स्वागत छ भाइ डेभिड वार्नर ।”
तेलुगु सिनेमा ‘रोबिन हुड’ लाई चर्चित निर्देशक भेन्की कुडुमुलाले निर्देशन गरिरहेका छन् । यो चलचित्र आगामी मार्च २८ मा विश्वव्यापी रूपमा रिलिज हुँदैछ ।
डेभिड वार्नर भारतीय क्रिकेट प्रेमी दर्शकहरू माझ निकै लोकप्रिय खेलाडी हुन् । उनले इन्डियन प्रिमियर लिग (आईपीएल) मा सनराइजर्स हैदराबादका लागि उत्कृष्ट प्रदर्शन गर्दै टिमलाई उपाधि समेत जिताएका थिए । उनको बलियो फ्यान बेसले अब चलचित्र क्षेत्रमा पनि उत्साहजनक प्रतिक्रिया दिने अपेक्षा गरिएको छ ।
वार्नरको सिनेमामा प्रवेशले खेलकुद र मनोरञ्जन क्षेत्रबीचको सम्बन्धलाई अझ नजिक ल्याउने अनुमान गरिएको छ । क्रिकेटबाट चलचित्रसम्मको उनको यात्रा कत्तिको सफल हुने हो, त्यो भने सिनेमा रिलिजपछि मात्र थाहा हुनेछ ।
