सिनेमाका मुख्य कलाकारबिना एक्लै ‘अञ्जिला’को प्रचार गर्दै निर्देशक चाम्स
काठमाडौं । सामान्यतया सिनेमाको प्रचारमा को हिँड्छ ? पक्कै पनि कलाकार ।
तर, सबै सिनेमाको हकमा यो लागु नहुँदोरहेछ । कहिलेकाँही सिनेमाका कलाकार बिना पनि चलचित्रको प्रचार हुनेरहेछ ।
यस्तै भइरहेको छ, अहिले चलचित्र ‘अञ्जिला’मा । चलचित्रका मुख्य कलाकार छैनन् । मुख्य भूमिकामा रेही एन्जिला तुम्बाप्पो सुब्बा ग्रिसमा फुटबल खेलिरहेकी छिन् । दयाहाङ राई र सिर्जना सुब्बा मण्डला थिएटरले आयोजना गरेको अन्तर्राष्ट्रिय नाटक महोत्सवमा व्यस्त छन् ।
त्यसैले निर्देशक मिलन चाम्स आफैँ हलहलमा पुगेर सिनेमाको प्रचार गरिरहेका छन् । उनीसँगै हुन्छन्, निर्माता प्रेम श्रेष्ठ ।
निर्देशक हल पुग्छन्, दर्शकलाई भेट्छन् । चलचित्र ‘अञ्जिला’ बनाउँदाका स्मरण सुनाउँछन् । एन्जिलाका केही मार्मिक र सफलताको कथा सुनाउँछन्, अनि दर्शकलाई धन्यवाद दिँदै फर्किन्छन् । यसैगरी उनको दैनिकी बितिरहेको छ । चलचित्रको प्रचार भइरहेको छ ।
मिलन सिनेमाको प्रचारमा मजाले खट्ने निर्देशक हुन्, त्यसैले यो सिनेमाको प्रचारमा हिँडिरहेका छन् । सायदै यति धेरै खट्ने निर्देशक होलान्, जो कलाकार नभए पनि एक्लै हलहलमा पुगेर दर्शक भेटिरहन्छन् । प्रतिक्रिया लिइरहन्छन् । आफ्नो चलचित्रबारे बोलिरहन्छन् ।
उनको यो मेहनतको फल पनि देखिरहेको छ । चलचित्रलाई दर्शकले मन पराइरहेका छन् । हलमा ठूलो संख्यामा दर्शक सिनेमा हेर्न पुगिरहेका छन् ।
समीक्षक र दर्शक दुवैबाट राम्रो समीक्षा पाएको चलचित्र अहिले उच्च अकुपेन्सीसहित चलिरहेको छ ।
‘अञ्जिला’ राष्ट्रिय महिला फुटबल क्लबकी कप्तान तथा गोलरक्षक एन्जिला सुब्बाको बायोपिक हो । यसमा उनको बाल्यकालदेखि खेल जीवनसम्मको संघर्ष र सफलताको भावुक कथा प्रस्तुत गरिएको छ ।
बिहीबार रिलिज भएको नेपाली चलचित्र ‘अञ्जिला’ अहिले उच्च अकुपेन्सीसहित चलिरहेको छ । निर्माणपक्षले तीन दिनको ग्रसकलेक्सन पनि सार्वजनिक रहेको छ ।
निर्माताले आइतबार सार्वजनिक गरेको कलेक्सन रिपोर्टअनुसार यो चलचित्रले बिहीबार, शुक्रबार र शनिबार गरी दुई करोड ७ लाख व्यापार गरेको छ ।
चलचित्रका निर्माता प्रेमकुमार श्रेष्ठ हुन् । मिलन चाम्सले निर्देशन गरेको चलचित्रमा एन्जिलाको साथमा प्रेमकुमार श्रेष्ठ, सुनिल थापा, दयाहाङ राई, विजय बराल, सिर्जना सुब्बा, माओत्से गुरुङ, सुमीन गुरुङ, बुद्धि तामाङ लगायतका कलाकारको अभिनय रहेको छ ।
