यस्तो छ हिट गीत ‘जेल पनि सहुँला’को सिक्वेल
काठमाडौं । पाँच वर्षअघि सार्वजनिक भएको लोकप्रिय गीत ‘जेल पनि सहुला’को सिक्वेल सार्वजनिक भएको छ । बिहीबार यस गीतको सिक्वले ‘जेल पनि सहुला: मर्नु परे मरौँला’ सार्वजनिक भएको हो ।
सार्वजनिक भएसँगै यो नयाँ गीतले दर्शकको ध्यान तानिरहेको छ । गीतमा गायिका मेलिना राई र गायक बलबहादुर राजवंशीको स्वर रहेको छ ।
कलाकार जीवन भट्टराई र लक्ष्मी बर्देवाको अभिनय रहेको यस गीतको भिडियोमा शिक्षिका र कार्यालय सहयोगीबीचको प्रेमकथा प्रस्तुत गरिएको छ ।
पहिलो संस्करणमा प्रेम सम्बन्धको सुरुवात देखाइएको थियो भने सिक्वेलमा उनीहरू प्रेमलाई पूर्णता दिन सहर छिरेको कथा प्रस्तुत गरिएको छ ।
जीवन र लक्ष्मीकै निर्देशनमा तयार गरिएको यस भिडियोको छायांकन पहिलो गीतझैँ रामेछापकै विद्यालय परिसरमा गरिएको हो । ‘जेल पनि सहुला’ गीतले लक्ष्मी र जीवनलाई म्युजिक भिडियो क्षेत्रमा स्थापित गराउन ठूलो भूमिका खेलेको थियो । यस गीतको लोकप्रियतासँगै उनीहरूको म्युजिक भिडियोमा माग पनि बढेको छ ।
लक्ष्मी र जीवनले हालसम्म करिब चार दर्जन म्युजिक भिडियोमा सहकार्य गरिसकेका छन् । ‘जेल पनि सहुला’ ले युट्युबमा साढे २ करोडभन्दा बढी भ्युज पाइसकेको छ ।
पहिलो गीतलाई दर्शकले अत्यधिक माया गरेकाले सिक्वेल निर्माण गरिएको निर्देशकसमेत रहेकी लक्ष्मी बर्देवाले बताएकी छिन् ।
