अल्लु अर्जुन बने भारतको सबैभन्दा महँगो अभिनेता
काठमाडौं । दक्षिण भारतीय सुपरस्टार अल्लु अर्जुन भारतमा सबैभन्दा धेरै कमाउने अभिनेता बनेका छन् ।
‘पुष्पा २’ बाट धेरै ठूला बक्स अफिस रेकर्ड तोडेका उनले पारिश्रमिकको हिसाबले शाहरुख खान, सलमान खान जस्ता बलिउड अभिनेतालाई पछाडि पारेका छन् ।
अल्लु अर्जुनले आफ्नो आगामी शीर्षकविहीन चलचित्रको लागि १७५ करोड रुपैयाँको सम्झौतामा हस्ताक्षर गरेका छन् । युवा निर्देशक एटलीले यो सिनेमा निर्देशन गर्नेछन् । जसले पहिले शाहरुख खानसँग मिलेर ‘जवान’ बनाएका थिए ।
पिंकभिल्लाको हालैको रिपोर्टमा स्रोतले भनेका छन् कि अल्लु अर्जुनले आफ्नो आगामी चलचित्रको लागि प्रोडक्सन हाउस सन पिक्चर्सका निर्माताहरूसँग १७५ करोड भारुमा सम्झौता गरेका छन् । यो पारिश्रमिक बाहेक अल्लु अर्जुनले सिनेमाको नाफामा १५ प्रतिशत हिस्सा पनि लिनेछन् ।
यति ठूलो सम्झौता गरेसँगै अल्लु अर्जुन पारिश्रमिकका हिसाबले भारतको सबैभन्दा महँगो अभिनेता बनेका छन् ।
अल्लु अर्जुनले यो चलचित्रको लागि अगस्ट २०२५ को मिति दिएका छन् । चलचित्रको छायांकन अगस्ट र अक्टोबरको बीचमा हुनेछ ।
हाल यो चलचित्रको शीर्षक छैन र यसलाई कार्य शीर्षक ‘ए ६’ दिइएको छ । रिपोर्टका अनुसार यो एक मास इटरटेन्टमेन्ट सिनेमा हुनेछ जसको दृश्य, पटकथा र परिचयमा नवीनता हुनेछ ।
अहिलेसम्म यस चलचित्रसँग सम्बन्धित कुनै आधिकारिक घोषणा भएको छैन । यो एटली र अल्लु अर्जुन दुवैको लागि ठूलो सिनेमा हुनेछ ।
अल्लु अर्जुनको अन्तिम रिलिज भएको ‘पुष्पा २ः द रुल’ थियो । यो चलचित्रले १८०० करोड रुपैयाँको बक्स अफिस कलेक्सन गरेको थियो । यो सिनेमाका लागि उनले ३०० करोड रुपैयाँ पारिश्रमिक पाएका थिए ।
