सलमान खानको जवाफ: ‘जब नायिकालाई समस्या छैन, तपाईंलाई किन छ?’
काठमाडौं । बलिउड अभिनेता सलमान खान र दक्षिण भारतीय अभिनेत्री रश्मिका मन्डना पहिलो पटक चलचित्र ‘सिकन्दर’मा एकसाथ देखिँदैछन् ।
यो चलचित्रको घोषणा भएदेखि नै ५९ वर्षीय अभिनेता खानको अपोजिटमा २८ वर्षीया अभिनेत्री मन्डनालाई कास्ट गरिएको विषयमा सामाजिक सञ्जालमा व्यापक ट्रोल भएको थियो । धेरै दर्शकहरूले यो उमेर अन्तरको कारण निर्माताहरूलाई आलोचना गरिरहेका थिए ।
आइतबार मुम्बईमा सिकन्दर चलचित्र ‘सिकन्दर’को ट्रेलर लन्च कार्यक्रम आयोजना गरिएको थियो । कार्यक्रममा जब सलमानलाई उनी र रश्मिकाबीचको ३१ वर्षको उमेर अन्तरबारे प्रश्न सोधियो अभिनेताले स्पष्ट रूपमा जवाफ दिँदै ट्रोल गर्नेहरूलाई कटाक्ष गरे ।
प्रश्नको जवाफमा सलमानले भने, ‘जब नायिकालाई कुनै समस्या छैन भने तपाईंलाई किन समस्या भइरहेको छ? यदि उनीहरूले विवाह गरेर छोरी जन्माइन् भने, हामी पनि उनीहरूसँगै काम गर्नेछौं । म अवश्य आमाको अनुमति लिनेछु ।’
सोही अवसरमा सलमानले अभिनेत्री रश्मिकाको मेहनतको खुलेर प्रशंसा गरे । उनले रश्मिकालाई देख्दा आफ्नो बाल्यकालको सम्झना आउने बताएका थिए । साथै, उनले रश्मिका हाल दुई ठूला फिल्महरू ‘पुष्पा २’ र ‘सिकन्दर’मा एकसाथ काम गरिरहेकाले उनको व्यस्तता झन् बढेको बताए ।
सलमानका अनुसार, “रश्मिका साँझ ७ बजेसम्म ‘पुष्पा २’को सुटिङ गरिरहेकी थिइन् । त्यसपछि राति ९ बजे ‘सिकन्दर’को सेटमा आइपुग्थिन् र बिहान ६:३० बजेसम्म हामीसँग सुटिङ गर्थिन् । फेरि ‘पुष्पा’ को सेटमा फर्किन्थिन् ।”
उनले थपे, “यस समयमा, उनको खुट्टामा चोट लागेको थियो, तर उनले सुटिङ कहिल्यै बन्द गरिनन् । चोट लागे पनि उनले लगातार काम गरिरहिन् ।”
‘सिकन्दर’मा सलमान खान र रश्मिका मन्डनासँगै काजल अग्रवाल, सत्यराज, सुनील शेट्टी, शर्मन जोशी र प्रतीक बब्बरले अभिनय गरेका छन् । यो चलचित्रलाई ए.आर. मुरुगदासले निर्देशन गरेका हुन् भने यसको निर्माण साजिद नाडियाडवालाले गरेका छन् ।
चलचित्र ‘सिकन्दर’ आगामी मार्च ३०, २०२५ मा ‘इद’को अवसर पारेर सिनेमाघरहरूमा प्रदर्शनमा आउने तयारीमा रहेको छ ।
