‘पुष्पा ३: द र्याम्पेज’ दुई वर्ष पछि आउने, विजय देवरकोन्डा खलनायक
काठमाडौं । ब्लकबस्टर चलचित्र ‘पुष्पा २ः द रुल’ पछि निर्माण कम्पनी मैत्री मुभी मेकर्सले नयाँ एक्सन थ्रिलर ‘जाट’ ल्याउँदैछ । यो चलचित्रमा बलिउड अभिनेता सनी देओल, रणदीप हुड्डा, विनीत कुमार सिंह, सैयामी खेर र रेजिना क्यासान्ड्रा मुख्य भूमिकामा देखिनेछन् ।
गोपीचन्द मालिनेनी निर्देशित ‘जाट’को ट्रेलर सार्वजनिक भइसकेको छ । ट्रेलर लन्चका क्रममा पुष्पा फ्रान्चाइजका निर्माताले तेस्रो सिक्वेलबारे अपडेट दिएका छन् ।
मैत्री मुभी मेकर्सका निर्माता रवि शंकरले ‘पुष्पा ३: द र्याम्पेज’को पुष्टि गर्दै यसको निर्माण सुरु हुन अझै समय लाग्ने बताएका छन् । उनका अनुसार निर्देशक सुकुमार हाल राम चरण अभिनित अर्को चलचित्रमा व्यस्त छन्, जुन पूरा भएपछि मात्र ‘पुष्पा ३’ को काम अघि बढ्नेछ ।
निर्माता रविले भने, “सुकुमार अहिले राम चरणको सिनेमा निर्देशन गर्दैछन् । यो प्रोजेक्ट पूरा भएपछि मात्र ‘पुष्पा ३’ सुरु हुनेछ, जसमा कम्तिमा दुई वर्ष लाग्नेछ ।”
यस्तै, अल्लु अर्जुनले यसबीचमा निर्देशक एटलीसँग नयाँ सिनेमा सुरु गर्ने तयारी गरिरहेका छन् । यो चलचित्र ‘पुष्पा ३’ भन्दा पहिले फ्लोरमा जानेछ, तर यसको निर्माणमा मैत्री मुभी मेकर्स संलग्न छैन ।
रिपोर्टहरूका अनुसार ‘पुष्पा ३’ को कथा अझ भव्य बनाइँदैछ, जसमा विजय देवरकोन्डा प्रमुख खलनायकको रूपमा देखिन सक्छन् । यसैगरी, रश्मिका मन्डाना र फहाद फासिल आफ्नो अघिल्लो भूमिकामा पुनः देखिनेछन् ।
यो चलचित्र २०२८ मा रिलिज हुने अनुमान गरिएको छ, तर आधिकारिक पुष्टि भने भएको छैन । ‘पुष्पा ३’ घोषणापछि पुष्पा फ्रान्चाइजका फ्यानहरू उत्साहित भएका छन् र सिनेमाबारे थप अपडेटको प्रतीक्षा गरिरहेका छन् ।
