प्रकाशले हिटमा ह्याट्रिक गर्लान्, कि दर्शकलाई निराश बनाउलान् ?
काठमाडौं । प्रकाश सपूतको निर्देशन, लेखन तथा अभिनय रहेको चलचित्र ‘वसन्त’ चैत २२ गते प्रदर्शन हुँदा कि हिट हुन्छ कि फ्ल्प । यी दुई बाहेक तेस्रो विकल्प हुँदैन ।
गीतमार्फत आफूलाई पटकपटक प्रमाणित गरिसकेका प्रकाशका यसअघिका दुईवटा सिनेमा ‘परदेशी–२’ र ‘पूर्ण बहादुरको सारङ्गी’ पनि हिट भएका थिए ।
‘परदेशी–२’ समीक्षात्मक हिसाबले कमजोर रहे पनि व्यापारिक हिसाबले भने सफल रह्यो । ‘पूर्ण बहादुरको सारङ्गी’ समीक्षा र बक्सअफिस दुवैमा धेरै माथि रह्यो ।
यी चलचित्रमा अभिनय मात्रै गरेका प्रकाशले सफलताको स्वाद चाखे । चैत २२ गते प्रकाश सिनेमा हलका ठूलो पर्दामा देखिँदा अभिनयका हिसाबले यो उनको तेस्रो चलचित्र हुनेछ । निर्देशनका हिसाबले डेब्यु ।
बक्सअफिसमा प्रकाशले सफलताको ह्याट्रिक गर्छन् वा त्यो उनको यो रहर अधुरै रहनेछ, यो भने हेर्न बाँकी छ । तर, धेरैले ‘वसन्त’ सफल हुन्छ भन्ने अपेक्षा गरेका छन् ।
यो अपेक्षा गरिरहँदा र प्रकाशप्रति भरोसा गरिरहँदा सिनेमाका प्रचार सामग्री भने बलियो देखिएका छैनन् । सिनेमा गीत पनि सोचेजस्तो हिट भएका छन् । त्यसैले उनलाई यतिबेला चर्को दबाब देखिएको छ ।
तर, यसअघिका उनले काम गरेका चलचित्र र ल्याएका गीतको सफलताले दर्शकले ‘वसन्त’बाट पनि त्यस्तै अपेक्षा भने गरेका छन् । अपेक्षा पूरा हुन्छ वा प्रकाशले दर्शकलाई निराश बनाउँछन्, त्यो भने अहिलेलाई प्रतिक्षाको विषय हो ।
‘वसन्त’मा प्रकाश सपूत, स्वस्तिमा खड्का, प्रभात पाल ठकुरी, श्री शिवान्सी, उर्मिला लाम्गादे, खड्क बहादुर पुन (खबपु), अनुप बराल, कमलमणि नेपाल, प्रकाश घिमिरेलगायत कलाकारको अभिनय छ ।
गलबन्दी प्रोडक्सनको प्रस्तुति रहेको यो सोसल ड्रामा सिनेमामा कथा, पटकथा र संगीत स्वयं निर्देशक प्रकाशले तयार पारेका छन् । सिनेमाले विपन्न विश्वकर्मा समुदायको छोराले लेखक बन्नका लागि गरेको संघर्षको कथा प्रस्तुत गर्नेछ । तर, यसबाहेक पनि कथा आउने प्रकाशले बताएका छन् ।
सिनेमाका निर्माता मोहन विश्वकर्मा र बिन्दु बोहोरा हुन् भने कार्यकारी निर्मातामा अनुरोध भट्टराई, नाना थकाली र वीरेन्द्र नारायण श्रेष्ठ छन् ।
गायक तथा निर्देशक प्रकाशको जन्मथलो बागलुङ, काठमाडौं र तराईका विभिन्न स्थानहरूमा सिनेमाको छायांकन गरिएको हो ।
सिनेमाका छायांकार सुसन प्रजापति हुन् । काठमाडौं उपत्यकामा डिसिएन र मोफसलमा एफडी कम्पनीले वितरण गर्नेछन् ।
