दयाहाङका लागि दोहोरियो ‘वैशाख १’ र ‘माघ २६’
काठमाडौं । अभिनेता दयाहाङ राईले २०८० सालमा एकै दिन दुई चलचित्र प्रदर्शन हुने दुर्भाग्य भोगेका थिए । जहाँ एकसाथ आफ्नै सिनेमा रिलिज हुँदा उनले आफैसँग प्रतिस्पर्धात्मक चुनौती सामना गर्नुपर्यो ।
गत वर्ष २०८० को सुरुवातमै दयाहाङका दुई चलचित्र ‘जारी’ र ‘बिहे पास’ एकसाथ रिलिज भएका थिए । यसपछि २०८० सालमै माघ २६ मा अन्य दुई सिनेमा दोस्रो पटक जुध्दा पनि उनी सोही परिस्थितिमा फसेका थिए । जसमा ‘दयारानी’ र ‘हात्तीछाप’ रहेका थिए ।
दुई चलचित्र एकसाथ प्रदर्शनमा आउँदा आफैलाई असर परेको देखेका उनले अघिल्लो वर्षको तुलनामा यस वर्ष कमै देखिए ।
दयाहाङका हरेक महिनाजसो चलचित्र आइरहेको आरोप लागिरहँदा अघिल्लो वर्ष २०८० मा झण्डै एक दर्जन चलचित्रमा काम गरे, नौ वटा सिनेमा प्रदर्शनमै आएका थिए ।
०८१ मा केही समयको अन्तर देखियो । यस वर्षको हिसाबले दयाहाङको वैशाख २१ मा ‘मनसरा’ प्रदर्शन भयो, यसपछि असार २८ गते रिलिज भएको ‘घर ज्वाईं’मा देखिएका उनी करिब ६ महिनाको अन्तरालमा चलचित्र ‘कार्साङ’मा देखिए ।
त्यसयता दयाहाङ लगातर ‘दुःखी आत्मा’, ‘अञ्जिला’ र ‘राजागंज’ मा देखिए । फागुन २९ गते ‘अञ्जिला’ र चैत १ गते ‘राजागंज’ प्रदर्शन हुदाँ यतिवेला उनका लागि गएको वर्षको वैशाख १ र माघ २६ दोहोरियो ।
‘अञ्जिला’ र ‘राजागंज’ एक दिनको अन्तरालमा प्रदर्शनमा आए पनि दुई मध्ये एक चल्यो भने अर्को चल्न सकेन । दुई चलचित्र करिब एकै समयमा रिलिज हुँदा, एकले राम्रो व्यापार गर्दा अर्को पिछडिनु स्वाभाविक थियो ।
राष्ट्रिय महिला फुटबल टोलीकी कप्तान एन्जिला तुम्बाको सुब्बाको जीवन संघर्षमा आधारित ‘अञ्जिला’ यस वर्षको सुपरहिट सिनेमा बनिसकेको छ । करिब २ करोडमा बनेको चलचित्रको १३ दिनसम्मको कमाइ ८ करोड ७ लाख रुपैयाँ ग्रसकलेक्सन छ । यो निर्माताले उपलब्ध गराएको तथ्यांक हो ।
‘अञ्जिला’ सफल हुँदै गर्दा दयाहाङले ठूलो अपेक्षा राखेको ‘राजागंज’ भने यस वर्ष न्यून व्यापार गर्ने सिनेमाको सूचीमा खुम्चिएको छ । बोर्ड स्रोतका अनुसार फिल्मको व्यापार २० लाख पनि पुगेको छैन । दर्शक अभावले कति हलमा यो चलचित्र दुई दिन पनि टिक्न सकेन ।
दयाहाङले ‘राजागंज’लाई बढी प्राथमिकता दिएको देखिए पनि व्यापारिक हिसाबले ‘अञ्जिला’ सफल भयो । यसअर्थ ‘राजागंज’ उनका लागि चलचित्र ‘वसन्त’मा समावेश गीतले भने जस्तै ‘माया त गरिस कान्छा बिना स्वादैको’ जस्तै भएको छ । किनकि, उनका अघिल्ला दुई फिल्म ‘कार्साङ’ र ‘दुःखी आत्मा’ चल्न सकेका थिएनन् ।
दयाहाङले बढी प्रचार गरेको ‘राजागंज’ पनि असफल सावित भयो । केही फिल्म समीक्षकले तारिफ गरे पनि दर्शक अभावका कारण व्यापार ठप्प भयो ।
