नेपाललाई सिनेमा छायांकनको हब बनाऊ, ‘लिभ फरेवर एन्ड नेभर डाई’बाटै यसको सुरुवात गर
करिब पाँच अर्ब नेपाली रुपैयाँमा बन्न लागेको चिनियाँ चलचित्र नेपालमा छायांकन हुँदैछ । ‘लिभ फरेवर एन्ड नेभर डाई’ नामक चलचित्र नेपालमा ५० प्रतिशत छायांकन हुने बताइएको छ ।
यो चलचित्रको केही छायांकन सुरु भइसकेको र बाँकी छायांकन केही महिनामा हुने खबर सार्वजनिक भएको छ । पाँच अर्ब नेपाली रुपैयाँमा बन्ने चलचित्रको ५० प्रतिशत छायांकन नेपालमा हुँदा ठूलो रकम नेपालमा खर्च हुनेछ । आर्थिक हिसाबले यो आफैँमा राम्रो कुरा हो ।
यसबाहेक ‘लिभ फरेवर एन्ड नेभर डाई’मा नेपाली कलाकारले पनि अभिनय गर्ने कुरा बाहिर आएको छ, यो अर्को सुखद पक्ष हो ।
यो भन्दा पनि अर्को राम्रो पक्ष भनेको यहाँका प्राविधिकले सिक्न पाउने सिप हो । चिनियाँ टेक्टिनिसियनसँग काम गर्दा उनीहरूसँग सिक्न पाउने स्किल सबैभन्दा महत्वपूर्ण पक्ष हो ।
कुनै पनि विदेशी चलचित्र नेपालमा छायांकन हुँदा कम्तीमा ६० प्रतिशत प्राविधिक स्वदेशी प्रयोग गर्नुपर्ने वाध्यकारी कानुनी प्रावधान छ । कडा अनुशासनमा बस्ने चिनियाँले यो नेपाली काननुको उल्लंघन पक्कै गर्ने छैनन् भन्ने अपेक्षा गरौँ ।
अहिलेसम्म आएको जानकारीअनुसार ‘लिभ फरेवर एन्ड नेभर डाई’को टिमले होलीको सिन खिचिसकेको छ । अब काठमाडौं, लुम्बिनी र चितवनमा सिनेमा खिच्नेछ । काठमाडौं उपत्यकामा सिनेमा खिच्दा यहाँको सांस्कृतिक र धार्मिक पक्ष समेटिनेछ । लुम्बिनीमा खिच्दा गौतम बुद्धको भूमी र बुद्धिजमको कुरा अटाउनेछ । चितवनमा खिच्दा विश्वकै दुर्लभ एकसिङे गैंडा र जंगल सफारी समेटिनेछ ।
चिनियाँ चलचित्र उद्योग अहिले विश्वकै ठूलो सिनेमा उद्योगमध्ये एक हो । त्यहाँको बिग बजेटको सिनेमा नोपलमा खिचिनु भनेको सिनेमा पर्यटनका हिसाबले नेपालको प्रमोट हुनु हो । प्रचार हुनु हो । त्यो भन्दा पनि ठूलो कुरा पर्यटनका हिसाबले नेपालको प्रचार हुनु हो । नेपालमा चिनियाँ पर्यटक सबैभन्दा धेरै आउँछन् । यो सिनेमा रिलिज भएपछि नेपालमा चिनिया पर्यटक थप बढ्ने निश्चित छ । त्यसैले ‘लिभ फरेवर एन्ड नेभर डाई’ नेपालमा खिचिनु आफैँमा ऐतिहासिक हो ।
नेपालमा सिनेमा खिच्न निकै झन्झटिलो छ । विभिन्न तहमा लिनु पर्ने सरकारी अनुमति र करका कारण विदेशीले दिक्क मान्ने गरेका छन् । जबकी सिनेमा पर्यटनका लागि नेपाललाई विश्वकै हब बनाउने र पर्यटनका लागि चलचित्रलाई प्रयोग गर्ने हो भने नेपालमा विदेशी चलचित्र छायांकन गर्न सरकारले सजिलो बनाइदिनुपर्छ ।
‘लिभ फरेवर एन्ड नेभर डाई’बाटै नेपाल सरकारले विदेशी चलचित्र छायांकनका लागि सहज वातावरण बनाइदियोस् । नेपालमा चलचित्र खिच्न सहज छ भन्ने सन्देश चीनसँगै विश्वमा यही चलचित्रबाट सन्देश दिन सकोस् । यसले नेपाली चलचित्र उद्योगमात्रै होइन समग्र पर्यटन प्रवर्द्धनमै ठूलो योगदान पुग्नेछ ।
