‘के घर के डेरा: घर नम्बर २’ को प्रदर्शन मिति घोषणा
काठमाडौं । दीपेन्द्र के खनालको निर्देशनमा निर्माण भएको चलचित्र ‘के घर के डेराः घर नम्बर-२’ को प्रदर्शन मिति तय गरिएको छ ।
निर्देशक खनालले विहीबार सामाजिक सञ्जाल मार्फत चलचित्रको प्रदर्शन हुने घोषणा गरेका हुन् ।
यसअघि छायांकन नसकिंदै यो सिनेमाको गत माघ ११ गतेलाई रिलिज मिति तय गरिएको थियो । तर, निर्माता र वितरको आन्तरिक विवादले सो मितिमा प्रदर्शन हुन सकेको थिएन ।
अब ‘के घर के डेराः घर नम्बर-२’ आगामी जेठ ९ गतेदेखि प्रदर्शन हुने छ । निर्देशक खनालले प्रदर्शकहरूसँग समन्वय गरेर नै यो मिति तय गरिएको बताए ।
‘कर्णाली ब्लुज’ पुस्तकका लेखक बुद्धिसागरको कथा रहेको यस चलचित्रमा खगेन्द्र लामिछाने, निश्चल बस्नेत, आर्यन सिग्देल, केकी अधिकारी, उपासना सिंह ठकुरी, प्रकाश घिमिरे, श्रृजना नापित, संजोग रसाइली, रुविना घिमिरे लगायतका कलाकारको अभिनय रहेको छ ।
‘के घर के डेराः घर नम्बर-२’ ए प्लस इन्टरटेन्मेन्ट र नटराज क्रियशनको ब्यानरमा निर्माण भएको हो । सिनेमामा शरद श्रेष्ठ, किरण महर्जन र राजीव श्रेष्ठले लगानी रहेको छ ।
चलचित्रका कार्यकारी निर्माता युवराज कार्की हुन् भने सह-निर्मातामा ओम प्रकाश अग्रवाल र महेश किजु छन् । सिनेमामा कृष्णबहादुर थापाको छायांकन रहेको छ ।
निर्देशक खनालले ‘के घर के डेरा’को पुरै सिक्वेल नभएर ‘के घर के डेराः घर नम्बर-२’ अर्काे घरको कथामा बनेको बताए । उनले कथा जे भए पनि चलचित्र अर्थपूर्ण बनेको दाबी गरे ।
