प्रचारको फरक अभ्यास गर्दै ‘भूठान’, विश्वास लागेन ?
काठमाडौं । शुक्रबार काठमाडौंका सडकमा एकातिर गणतन्त्रवादी र अर्कोतिर राजावादीको प्रदर्शन थियो । गणतन्त्रवादी शान्त देखिँदा राजावादीको आन्दोलन बिद्रुप बन्यो । घर र गाडीमा तोडफोड गरे । घरमा आगो लगाए । एकै छिनमा तीनकुने रणमैदान भयो । दुईजनाको ज्यान नै गयो ।
त्यसको प्रभाव सिनेमालाई पनि पर्यो । हलमा दर्शक जान पाएनन् । नयाँ रिलिज भएका देखि रिलिज भइसकेका सिनेमासम्मलाई प्रभाव पर्यो । त्यतिमात्रै पनि होइन, रिलिजको तयारीमा रहेको सिनेमालाई पनि पर्यो ।
वैशाख १२ मा रिलिज हुने ‘भूठान’को कार्यक्रम साँझ ६ बजेदेखि मैतिदेवीमा रहेको चिया पसल ‘टि–टेल’मा थियो । जहाँ ‘भूठान’को पोस्टर र स्ट्यान्डी केही दिन अगाडिदेखि नै लागिसकेको थियो ।
साँझ ६ बजे ‘टि–टेल’को कार्यक्रममा छिर्दै गर्दा कार्यक्रम सुरु भइसकेको थियो । तर निर्देशक विनोद पौडेल बाहिरै भेटिए । हस्याङफस्याङ गर्दै ‘कर्फ्युले त बर्वादै गर्यो नि’ भन्दै थिए । कोटेश्वर–तीनकुने क्षेत्रमा कर्फ्यु लागेपछि त्यही क्षेत्रमा बस्ने उनी चोर बाटो हुँदै आएका रहेछन् ।
‘टि–टेल’मा प्रवेश गर्दा ‘टि–टेल’ भरिभराउ थियो । मञ्चमा कोही गाउँदैथियो । उनले गाइसकेर ओर्लिएपछि आकांक्षा कार्कीले निर्देशक विनोद पौडेललाई बोलाइन् । उनले ‘भूठान’बारे बोल्न आग्रह गरिन् ।
‘भूठान’बारे विनोदले केही बोले । जस्तै, सिनेमा कसरी बन्यो । कहाँ बन्यो । कहाँ खिचियो । सिनेमा सबै अमेरिकामा खिचिएको उनले जानकारी दिए । कलाकार कोको छन् बताए ।
‘भूठान’ले कस्तो कथा भन्छ र कसरी भन्छ भन्ने पनि सुनाए ।
कहाँको कथा भन्छ भन्ने पनि सुनाए । ‘टि–टेल’को प्रांगणमा रहेका चियाका पारखीले चियाको चुस्कीसँगै ‘भूठान’का कुरा सुने ।
यही बीचमा निर्देशक विनोदले भने, “म हाम्रो सिनेमालाई माया गरिदिनु भन्दिनँ । तर, यति चाहिँ भन्छु– टिजर र गीत आएको छ । त्यो हेरिदिनु । त्यो राम्रो लाग्यो भने बल्ल हेर्न गइदिनुहोला ।”
त्यसपछि मञ्च लिए, चियाका पारखीले । कसैले कविता, कसैले मुक्तक, कसैले जोक, कसैले गजल सुनाए भने कसैले चाहिँ गीत नै ।
जे होस्, ‘टि–टेल’मा रहुन्जेलसम्म त्यहाँका सहभागीले राजावादी र गणतन्त्रवादी दुवैको आन्दोलन बिर्सिए । भर्खरै लागेको कर्फ्यु पनि भुले । यसो भनौं एकछिन दुनिया भुलेर रमाए । साँझ को कसरी फर्किए ? सायद कठिन नै भयो होला ।
खैर, ‘भूठान’को फरक शैलीमा प्रचार भइरहेको छ । यो प्रचारको फरक अभ्यास कति प्रभावकारी होला त्यो हेर्न चाहिँ वैशाख १२ कुर्नै पर्यो ।
अंग्रेजीमा ‘द वल्र्डस् ह्याप्पिएस्ट म्यान’ नाम रहेको यो चलचित्रको मुख्य भूमिकामा हरिवंश आचार्य छन् । दयाहाङ राई, अनुराधा मजुमदार, पूजा चन्द–लामा, रिचा घिमिरे, जोएस पाण्डे, अदिति प्याकुरेल, टम क्रेन, विमल सुवेदी छन् ।
हलिउडका विश्वविख्यात अभिनेता बु्रस डर्नले पनि विशेष भूमिकामा अभिनय गरेका छन् । हलिउडको साग अफट्रा अन्तर्गत रहेर बनेको यो पहिलो नेपाली चलचित्र हो जसमा हलिउडका केही प्राविधिकहरुले पनि काम गरेका छन् ।
भुटानदेखि भारत र नेपाल हुँदै अहिले अमेरिकामा बसोवास गरिरहेका भुटानीहरुको देशप्रेम र आफ्नो थातथलो छोड्न पर्दा घर हराएको कथा ‘भूठान’ले उठान गरेको छ ।
बुलबुल चलचित्रबाट नाम कमाएका विनोद पौडेलको निर्देशन रहेको ‘भूठान’का निर्मातामा अविरल थापा, सुशांक मैनाली, राजेन्द्र ठकुराठी, अमिताभ जोशी र किर्तना बाँस्कोटा छन् । सुसन प्रजापतिले खिचेका छन् ।
कार्यकारी निर्मातामा विकाश भिटो अधिकारी, कौशिला खनाल, रमेश भट्ट, अपार श्रेष्ठ छन् । अन्जय खड्काको सम्पादन, डिकेश खड्गी शाहीको ध्वनी, समवरण केमको संगीत, सूर्य शाहीको कास्टिङ, उज्जवल श्रेष्ठको पव्लिसिटी डिजाइन, विमल सुवेदीको प्रोडक्सन डिजाइन, वलिउडका प्रख्यात कला निर्देशक अन्जन गजुरेलको कला निर्देशन रहेको छ ।
चलचित्रलाई ठकुराठी ब्रोज, भ्याकेन्ट लाइट, एभरेष्ट इन्टरटेनमेन्ट, अमेरिकाको सहकार्यमा नेपालको अवेकन प्रोडक्सन् र अमेरिकाको म्याड मंकी फिल्मसले निर्माण गरेको हो ।
