‘सिकन्दर’ अघि सलमान खानका यी चलचित्रहरूले पनि निराश पारे, कथादेखि अभिनयसम्मको आलोचना
काठमाडौं । बलिउडका सुपरस्टार सलमान खानको बहुप्रतिक्षित चलचित्र ‘सिकन्दर’ मार्च ३० आइतबारका दिनबाट रिलिज भएको छ । तर, अपेक्षा गरिएजस्तो यो सिनेमाले प्रभाव पार्न नसकेपछि दर्शक र समीक्षक दुवै निराश देखिएका छन् । दर्शकहरूले सोचेका थिए कि ‘टाइगर ३’ मा जे छुटेको थियो, त्यो ‘सिकन्दर’ मार्फत पूरा हुनेछ । तर, पहिलो दिनमै कमजोर प्रदर्शन गरेपछि यो चलचित्र बक्स अफिसमा फ्लप साबित भएको छ ।
दर्शकहरुले सलमानको करिअरकै कमजोर सिनेमा भनेका छन् भने समीक्षकहरुले म्यासेज राम्रो भए पनि पटकथादेखि कलाकारको अभिनयसम्म हदै कमजोर रहेको समीक्षामा उल्लेख गरेका छन् । भारतका प्रायः मिडियाले सिनेमालाई २ रेटिङ दिएका छन् ।
यो पहिलो पटक भने होइन । यसअघि पनि सलमानका थुप्रै सिनेमाहरूले अपेक्षा अनुसार कमाई गर्न सकेनन् र आलोचना खेप्नुपर्यो ।
सलमान बलिउडका ठूला स्टारमध्ये एक हुन्, तर पछिल्लो समय उनका चलचित्रहरूले लगातार निराश पार्दै आएका छन् । ‘सिकन्दर’ को कमजोर प्रदर्शनसँगै उनका भविष्यका प्रोजेक्टहरूमा दर्शकको ध्यान केन्द्रित भएको छ । केही चलचित्रहरूले बक्स अफिसमा राम्रो व्यापार गरे पनि समीक्षक र दर्शकहरूले फ्लपको श्रेणीमा राखे ।
यहाँ सलमानका केही यस्ता सिनेमाहरूको चर्चा गरिएका छन्, जसले दर्शकलाई निराश बनाए ।
१. ‘किसी का भाई किसी की जान’
२०२३ मा ईदको अवसर पारेर रिलिज भएको यो एक्सन-रोमान्स चलचित्रमा पूजा हेगडे र अन्य कलाकारहरूको ठूला नाम समावेश थियो । तर, कथावस्तु, संवाद तथा अभिनयको चर्को आलोचना भयो र बक्स अफिसमा सफल हुन सकेन । फिल्मको बजेट १३२ करोड भए पनि १८२ करोड मात्र कमाएको थियो, जसले अपेक्षित सफलता प्राप्त गरेन ।
२. ‘टाइगर ३’
२०२३ मा सलमान खानको टाइगर फ्रान्चाइजका अघिल्ला दुई चलचित्रहरू ‘एक था टाइगर’ र ‘टाइगर जिन्दा है’ सुपरहिट थिए । तर, ‘टाइगर ३’ ले दर्शकको मन जित्न सकेन । क्याट्रिना कैफ र इमरान हाशमीसँगको सहकार्य भए पनि समीक्षकहरूको नकारात्मक प्रतिक्रिया पायो ।
३. ‘राधे: योर मोस्ट वान्टेड भाइ’
कोभिडकालमा रिलिज भएको यो फिल्मले न त बक्स अफिसमा न त ओटीटी प्लेटफर्ममा प्रभाव पार्न सक्यो । प्रभु देवा निर्देशित यस चलचित्रलाई दर्शकहरूले निराशाजनक भनेका थिए ।
४. ‘दबंग ३’
‘दबंग’ र ‘दबंग २’ सुपरहिट भए पनि, ‘दबंग ३’ ले त्यस्तो जादू गर्न सकेन । चलचित्रको कथा कमजोर रहेको दर्शक तथा समीक्षकहरूले बताएका थिए ।
५. ‘रेस ३’
रेस फ्रान्चाइजका अघिल्ला दुई चलचित्रहरू सैफ अली खानको प्रमुख भूमिकामा थिए, जसलाई दर्शकले रुचाएका थिए । तर, तेस्रो श्रृंखलामा सलमानको प्रवेशसँगै फिल्मले ठूला आशा जगाए पनि, समीक्षकहरू र दर्शकहरू निराश भए ।
६. ‘ट्यूबलाइट’
सलमान खान अभिनीत ‘ट्यूबलाइट’ ले राम्रो व्यापार गरे पनि दर्शकको अपेक्षा पूरा गर्न सकेन। चलचित्रको कथालाई कमजोर मानिएको थियो ।
७. ‘प्रेम रतन धन पायो’
२०१५ मा राजश्री प्रोडक्सनसँग पुनः सहकार्य गर्दै सलमान खानले ‘प्रेम रतन धन पायो’ ल्याएका थिए । फिल्मले राम्रो कमाई गर्यो, तर कथा कमजोर भएकाले समीक्षकहरूबाट सकारात्मक प्रतिक्रिया पाएन ।
