चैतबाट भागेको ‘नरसिंहा अवतार’ जेठमा आउने
काठमाडौं । चलचित्र ‘नरसिंहा अवतार’ आगामी जेठ ९ गते प्रदर्शनमा आउने भएको छ । निर्माणपक्षले सोमबार एउटा पोस्टरमार्फत् प्रदर्शन मिति घोषणा गरिएको हो ।
अभिनेता राजेश हमालको आठ वर्षपछिको पुनरागमन सिनेमा मानिएको यो चलचित्र यसअघि चैत २९ गते प्रदर्शनमा आउने चर्चा थियो । पूर्वनिर्धारित मितिमा अन्य दुई चलचित्र ‘कर्मा’ र ‘पिताम्बर’ पनि रिलिज हुने भएपछि भिडन्त टार्न यसको निर्माणपक्षले जेठ ९ गते आउने निर्णय गरेको हो ।
राजेश हमाललाई कमब्याक चलचित्रको रूपमा प्रचार गरिएको ‘नरसिंहा अवतार’लाई दर्शकहरू निकै उत्सुकताका साथ प्रतीक्षा गरिरहेका थिए । तर, निर्माणपक्षले अचानक मिति पर सार्ने निर्णय गर्यो जेठ ९ गते सोलो रिलिजको अवसर पारेर प्रदर्शन गर्न लागेको छ ।
चैत २९ गते चलचित्र बजारमा प्रतिस्पर्धा कम गर्न तथा बक्स अफिसमा राम्रो व्यापार सुनिश्चित गर्नका लागि निर्माण पक्षले नयाँ मिति तय गरेको बुझिएको छ ।
खासगरी, अभिनेता राजेश हमालले चलचित्रको राम्रो व्यापार होस् भन्ने हेतुले अन्य चलचित्रसँग एकैदिन भिड्न नहुने भन्दै निर्माण पक्षलाई मिति सार्न सुझाव दिएका थिए । उनको यो आग्रहलाई स्वीकार्दै निर्माण टिमले ‘नरसिंहा अवतार’लाई जेठ ९ मा रिलिज गर्ने निर्णय गरेको हो ।
जेठ ९ गतेलाई यसअघि निर्देशक दीपेन्द्र के खनालको चलचित्र ‘के घर के डेराः घर नम्बर-२’ को प्रदर्शन मिति तय गरिएको थियो । तर, यी दुवै चलचित्रको वितरक एउटै भएकाले ‘के घर के डेराः घर नम्बर-२’ को प्रदर्शन मिति एक साता अगाडि सारिएको छ । यससँगै, ‘नरसिंहा अवतार’ले एकल प्रदर्शनको अवसर पाउने भएको छ ।
‘के घर के डेराः घर नम्बर-२’ र जेठ १६ गते रिलिज हुने दिनेश राउत निर्देशित ‘महाभोज’ का मुख्य कलाकारहरू एउटै भएका कारण पनि यो निर्णय लिइएको हो । ‘महाभोज’ र ‘के घर के डेराः घर नम्बर-२’ दुवै चलचित्रमा आर्यन सिग्देल र खगेन्द्र लामिछाने प्रमुख भूमिकामा छन् । एक साताको अन्तरालमा यी दुई चलचित्रको रिलिज हुँदा प्रभाव पर्न सक्ने भएकाले ‘के घर के डेराः घर नम्बर-२’ लाई अगाडि सारेर ‘नरसिंहा अवतार’लाई एकल प्रदर्शनको अवसर दिइएको बुझिएको छ ।
यसमा पनि विशेष गरेर अभिनेता हमालले आफू धेरै समयपछि कमब्याक गर्न लागेको र एकल प्रदर्शन हुने अवसर मिलाइदिन आग्रह गरेपछि ‘के घर के डेराः घर नम्बर-२’ लाई एकहप्ता अगाडी सारिएको बुझिएको छ ।
‘नरसिंहा अवतार’मा राजेश हमालसँगै सरोज खनाल, राज कटुवाल, नीति शाह, सनिषा भट्टराई, उषा खड्गी, अर्जुन श्रेष्ठ, प्रशान्त ताम्राकार, नीर शाह, रमेश चन्द सोडारी, प्रकाश कुँवर, राजिभ जंग बस्नेत, दीपा शाही, प्रभु श्रेष्ठ, अमित गिरी, एभेलिना खड्का लगायतको अभिनय रहेको छ ।
ऐतिहासिक र पौराणिक कथामा आधारित भनिएको यस चलचित्रमा दीपक शर्मा ढकाल, नरेन्द्र महर्जन र ध्रुव न्यौपानेको लगानी छ । यसमा चन्द्र पन्तको द्वन्द्व निर्देशन रहेको छ ।
नेपाली चलचित्र क्षेत्रमा दशकौँदेखि ‘महानायक’ को रूपमा परिचित हमालको यो पुनरागमनलाई लिएर दर्शक अत्यन्त उत्साहित छन् । लामो समयपछि उनी मुख्य भूमिकामा देखिन लागेकाले चलचित्रको व्यापार र दर्शक प्रतिक्रियामा यसको ठूलो प्रभाव पर्ने अनुमान गरिएको छ ।
अब ‘नरसिंहा अवतार’ एकल प्रदर्शन हुने भएपछि यसले बक्स अफिसमा कस्तो प्रभाव पार्ने हो, त्यो हेर्न बाँकी छ ।
