‘ताण्डवम्’ पछि ‘हे माया’ निर्देशन गर्दै जुनिम
काठमाडौं । चलचित्र ‘हे माया’ निर्माण हुने भएको छ । दीपक लम्सालको लगानीमा निर्माण हुने सिनेमाको छायांकन आगामी जेठबाट गरिने बताइएको छ ।
यस चलचित्रलाई जुनिम गहतराजले निर्देशन गर्ने भएका छन् । गत फागुनमा प्रदर्शनमा आएको सिनेमा ‘ताण्डवम्’का निर्देशक गहतराजले दोस्रो चलचित्रको रूपमा ‘हे माया’ निर्देशन गर्ने भएका हुन् ।
‘हे माया’का लागि अहिलेसम्म धेरै कलाकारसँग मौखिक सहमति भइसकेपनि लिखित सम्झौता हुन बाँकी रहेकाले केही समयपछि सार्वजनिक गर्ने तयारी भइरहेको निर्देशक गहतराजले जानकारी दिए । सिनेमामा नाम चलेका कलाकारहरूको नै अभिनय रहने उनले बताएका छन् ।
नेपाली नयाँ वर्ष सुरु भएसँगै चलचित्रको कास्ट एण्ड क्रिउ सार्वजनिक गर्ने तयारी निर्माण टिमको भनाइ छ ।
निर्माता लम्साल लामो समयदेखि भारतको मुम्बईमा बसेर बलिउड र दक्षिण भारतीय सिनेमाको नेपाल रिलिजको चाँजोपाँजो मिलाउँदै आइरहेका छन् । उनले बलिउड सिनेमा नेपाल रिलिजमा लामो समय काम गरेपछि पहिलो पटक नेपाली सिनेमा निर्माणमा हात हाल्न लागेका हुन् ।
‘ताण्डवम्’मा जुनिमको निर्देशकिय क्षमता हेरेर नै आफ्नो सिनेमा निर्देशनमा जिम्मेवारी सुम्पेको निर्माता लम्सालले बताए ।
रियल इन्टरटेनमेन्ट प्रा.लीको ब्यानरमा निर्माण हुने सिनेमाको पटकथा तथा संवाद चक्रपाणि सांखीले लेखिरहेका छन् ।
