‘कर्मा’को ‘पागल’ अघिअघि, ‘वसन्त’को ‘हेर्दै आँखामा’ पछिपछि
काठमाडौं । चलचित्र ‘कर्मा’ र ‘वसन्त’को गीतबीच प्रतिस्पर्धा देखिएको छ । युट्युब ट्रेन्डिङमा यी ‘कर्मा’ र ‘वसन्त’को गीतबीच होडबाजी देखिएको छ ।
‘कर्मा’को गीत ‘पागल’ र ‘वसन्त’को गीत ‘हेर्दै आँखामा’ अहिले युट्युबको ट्रेन्डिङमा छन् । ‘पागल’ युट्युबको म्युजिक सेक्सनको दुई नम्बर ट्रेन्डिङमा आइपुगेको छ । ‘हेर्दै आँखामा’ युट्युब ट्रेन्ड्रिङको म्युजिक सेक्सनको चार नम्बरमा छ ।
‘पागल’ सोमबार सार्वजनिक भएको हो भने ‘हेर्दै आँखामा’ आइतबार सार्वजनिक भएको हो । यो समाचार तयार पार्दासम्म ‘पागल’ ६ लाख २९ हजारले हेरेका छन् भने ‘हेर्दै आँखामा’ ५ लाख १३ हजारले हेरेका छन् ।
‘पागल’मा सुशान्त केसीको शब्द, संगीत तथा स्वर छ । गीतको भिडियोमा चलचित्रका कलाकार विपिन कार्की र उपासनासिंह ठकुरीसँगै सुशान्त पनि देखिएका छन् ।
‘हेर्दै आँखामा’ सुगम पोखरेल समीक्षा अधिकारीले गाएको गीत हो । शब्द तथा संगीत भने प्रकाश सपूतको छ । भिडियोको प्रकाश र स्वस्तिमा खड्काको अभिनय छ ।
‘कर्मा’लाई सौरभ चौधरीले निर्देशन गरेका छन् भने ‘वसन्त’लाई प्रकाश सपूतले निर्देशन गरेका छन् ।
‘कर्मा’मा विपीन कार्की, उपासनासिंह ठकुरी र मुकुन भुसाल मुख्य भूमिकामा छन् ।
‘वसन्त’मा प्रकाश सपूत, स्वस्तिमा खड्का मुख्य भूमिकामा छन् । ‘वसन्त’ यही शुक्रबार रिलिज हुँदैछ । ‘कर्मा’ चैत २९ गते रिलिज हुँदैछ ।
‘कर्मा’मा विपिनसँगै उपासना सिंह ठकुरी, मुकुन भुसाल, दिब्यदेब, सरिता गिरी, बेन बस्नेत, सुज्यान सिलवाल, अनिल बुढाथोकी, निर्मल शर्मालागायतको अभिनय रहेको छ ।
एक्सन जनरामा निर्माण भएको ‘कर्मा’ ड्रामा, सस्पेन्स र एक्सन जनरामा निर्माण भएको छ । सिनेमाको कथा निर्देशक चौधरी स्वयंले लेखेका छन् ।
यो चलचित्रमा भाष्कर स्वाँरको संगीत निर्देशन, कविराज गहतराजको कोरियोग्राफी, श्री श्रेष्ठको द्वन्द्व निर्देशन र निमेष श्रेष्ठको सम्पादन छ ।
तारानाथ न्यौपाने मुख्य सहायक निर्देशक रहेको सिनेमामा समीर मियाको भिएफएक्स, उत्तम न्यौपानेको व्याकग्राउन्ड स्कोर, विजय बश्यालको पब्लिसिटी डिजाइन र राजेन्द्र मोक्तान कलरिस्ट रहेका छन् ।
आर्टिस्टिक इनटरटेनमेन्टको प्रस्तुति रहने ‘कर्मा’मा वसन्त लम्सालको लगानी रहेको छ ।
‘वसन्त’मा प्रकाश सपूत, स्वस्तिमा खड्का, प्रभात पाल ठकुरी, श्री शिभान्सी, उर्मिला लाम्गादे र खड्क बहादुर पुन ९खबपु०, अनुप बराल, कमलमणी नेपाल, प्रकाश घिमिरे, विशाल पहारीको अभिनय रहेको छ ।
गलबन्दी प्रोडक्सनको प्रस्तुति रहने सोसल ड्रामा सिनेमामा कथा, पटकथा र संगीत पनि निर्देशक सपूतले नै तयार पारेका हुन् ।
विपन्न विश्वकर्मा समुदायको छोराको लेखक बन्ने सपना र लक्ष्य हासिल गर्न उसले गर्ने संघर्षको कथा सिनेमाले भन्नेछ । सिनेमाको निर्मातामा मोहन विश्वकर्मा र बिन्दु बोहोरा तथा कार्यकारी निर्मातामा अनुरोध भट्टराई, नाना थकाली र वीरेन्द्र नारायण श्रेष्ठ छन् ।
