हरिवंशले किन भने ‘हरिबाहदुरको जुत्ता’ ‘पूर्ण बहादुरको सारङ्गी’बाट चोरिएको होइन ?
काठमाडौं । कलाकार हरिवंश आचार्यले आफूहरूले चलचित्र ‘पूर्ण बहादुरको सारङ्गी’बाट नाम नचोरेको बताएका छन् ।
आफू मुख्य भूमिकामा रहेको चलचित्र ‘हरिबहादुरको जुत्ता’को नाम ‘पूर्ण बहादुरको सारङ्गी’बाट चोरेको भन्ने आरोप लागिरहेका बेला उनले यस्तो बताएका हुन् ।
“पूर्ण बहादुरको सारङ्गी हिट भएपछि हरिबहादुरको जुत्ता पनि चल्छ भनेर त्यस्तो नाम राखे भन्ने आरोप लागिरहेको छ,” केही दिनअगाडि मण्डला थिएटरमा आयोजित एक कार्यक्रममा हरिवंशले भने, “तर त्यस्तो होइन । पूर्ण बहादुरको सारङ्गी कहिले लेखिएको हो त्यो त मलाई थाहा भएन तर हाम्रो चलचित्र हरिबहादुरको जुत्ता धेरै वर्ष पहिला नै लेखिएको चलचित्र हो ।”
दीपेन्द्र के खनालको निर्देशित ‘हरिबहादुरको जुत्ता’को निर्माण भइरहेको छ । सरोज ओली निर्माता रहेको चलचित्रको मुख्य भूमिकामा अभिनेता हरिवंश आचार्य छन् । चलचित्रको कथा पनि उनी स्वयंले लेखेका हुन् ।
एसएम मोसन पिक्चर्सको ब्यानरमा निर्माण भएको सिनेमामा सरोज ओली र मोहितवंश आचार्य निर्माताको रुपमा छन् । सामाजिक र हास्यकथावस्तुमा निर्माण भएको सिनेमा महजोडीको चर्चित हरिबहादुरको पात्रबाट प्रभावित छ ।
सिनेमामा हरिवंशसँगै प्रकाश सपूत, स्वस्तिमा खड्का, राजाराम पौडेल, किरण केसी, हरिहर शर्मा, पार्वती अधिकारी, दिब्यदेब पन्त, तारा शर्मा, दिनेश काफ्ले, सीता न्यौपानेको पनि अभिनय छ ।
सिनेमाको प्रदर्शन मिति आगामी वर्षको दशैंको फूलपातिलाई घोषणा गरिएको छ ।
