साइन्स फिक्सन ‘एक्लो’बाट बेनिशाको ‘क्विन मारा’ लुक्स सार्वजनिक

काठमाडौं । साइन्स फिक्सन जनरामा आधारित नेपाली सिनेमा ‘एक्लो’को क्यारेक्टर पोस्टर सार्वजनिक गरिएको छ । बिहीबार सिनेमाकी मुख्य अभिनेत्री बेनिशा हमालको क्यारेक्टर पोस्टर सार्वजनिक गरिएको हो ।
पोस्टरमा हमाललाई रानीको अवतारमा देखाइएको छ । उनको क्यारेक्टर नाम ‘क्विन मारा’ रहेको छ । उनको लुक्सले सिनेमा केही फरक बनेको अनुमान दर्शकले लगाउन सक्नेछन् ।
सिनेमाका निर्देशक प्रदीप शाही हुन् । लामो समयदेखि बेलायत बस्दै आएका शाहीले ‘एक्लो’लाई हलिउड स्तरको सिनेमा बनाउने तयारीमा जुटेका छन् ।
अहिले सिनेमाको लण्डनमा पोस्ट प्रोडक्सनको काम भइरहेको छ । सिनेमालाई तिहारको अवसरमा रिलिज गर्ने लक्ष्य राखिएको छ ।
सिनेमामा प्रदीप खड्का, विजय लामा, सुनील थापा, दिया पुन, बेनिशा हमाल, दिनेश डीसी, कविता नेपाली, सुरज सिंह ठकुरी, त्रिचु राई, कृष्णभक्त महर्जन, विकास अधिकरी, दिग्गज खत्री, विनोद सुवेदी ‘क्षितिज’, श्रीशेष श्रेष्ठ र बाल कलाकार जेमिन श्रेष्ठ र स्योन सविक सिंहलगायत बेलायती अभिनेता जेमी बेकनको अभिनय रहेको छ ।
सिनेमा ‘एक्लो’का निर्माता राजु कुमार गुरुङ, हरि श्रेष्ठ, विष्णु तामाङ, उत्सव विष्ट, भाइराजा थापा, नवीन सिवा, बागवीर पुन तथा कार्यकारी निर्माता विनोद सुवेदी ‘क्षितिज’ रहेका छन् ।
बाबु श्रेष्ठको छायांकन, राजु तामाङको द्वन्द्व निर्देशन, सेट डिजाइनरमा राजु पेन्टर, कला निर्देशनमा सन्तोष लामा तथा प्रोडक्सन डिजाइनरमा द्रोण प्रसाद पौडेल रहेका छन् ।