दर्शकको मन जितेसँगै व्यापारिक सफलता पाउँदै ‘ऊनको स्वीटर’
काठमाडौं । चलचित्र ‘ऊनको स्वीटर’ले व्यापारिक सफलता पाइरहेकाे छ । रिलिजको पहिलो सातामै दर्शकको मनसँगै व्यापारिक सफलता पनि पाइरहेकाे छ ।
रिलिजको पाँचौँ दिन बुधबार देशभरका हलहरूमा दर्शकको अत्यधिक भीड देखिएको छ भने, वितरकले ३५० भन्दा बढी शोहरूमा प्रदर्शन भएको र अधिकांश शोहरू हाउसफुल भएको जनाएका छन् ।
कतिपय हलहरूमा ‘डिल डे’ परेको अवसरमा दिनभर नै हाउसफुल शो चलेको वितरकको भनाइ छ । अधिकांश शोहरू भरिभराउ रहेकाले व्यापार राम्रो भएको अनुमान वितरकले गरेका छन् । यद्यपि, केही हलबाट अझै पूर्ण रिपोर्ट नआएकाले विस्तृत कलेक्सन चाँडै सार्वजनिक गरिने जनाइएको छ ।
चलचित्रको व्यापारसँगै यसको सङ्गीत पक्ष पनि उत्तिकै चर्चामा छ । हालै सार्वजनिक भएको नयाँ गीत ‘चाइनेजो जिन्दगानीमा’ले सामाजिक सञ्जालमा चर्चा पाइरहेकाे छ । रिलिजको तेस्रो दिन सार्वजनिक भएको यो गीतले श्रोतामाझ निकै राम्रो प्रतिक्रिया पाइरहेको छ । यसअघि रिलिज भएका गीतहरू (‘फूल’, ‘मखमली’ र ‘काफ्ले’)ले पनि करोडौँ दर्शकको मन जित्न सफल भइसकेका छन् ।
छैटौँ दिन आज बिहीबार पनि हलमा दर्शकको उपस्थिति उत्साहजनक देखिएको छ । अहिले काठमाडौं उपत्यकाका विभिन्न हलहरूमा कलाकारहरू दर्शकमाझ साक्षात्कार गरिरहेका छन् ।
दोस्रो हप्ताबाट भने देशव्यापी भ्रमण सुरु हुने भएको छ । निर्देशक नवीन चौहानका अनुसार दमौलीबाट सुरु हुने भ्रमण पोखरा, चितवन, बुटवल, दाङ, नेपालगन्ज, धनगढी, दमक, धरान, विराटनगर र इटहरीसम्म पुग्नेछ । भ्रमणमा अभिनेता विपिन कार्की, अभिनेत्री परीक्षा लिम्बु, एलेक्स पारस, गायक सुजन चापागाईँ, र निर्देशक स्वयं सहभागी हुनेछन् ।
नवीन चौहानको लेखन तथा निर्देशनमा बनेको ‘ऊनको स्वीटर’मा विपिन कार्की, मिरुना मगर, परीक्षा लिम्बु, एलेक्स पारस, विल्सन विक्रम राई, सुरज तमु, भावना खपाङ्गी मगर र सुनिल पोखरेलको दमदार अभिनय रहेको छ । ट्रेलर, टिजर र गीतहरूले निर्माणको सुरुदेखि नै चर्चा बटुल्न सफल यो चलचित्र दर्शकमाझ ‘हिट’ बन्दै गएको छ ।
