मनिषा कोइरालाले गणतन्त्र दिवसका दिन संवैधानिक राजतन्त्र आवश्यक रहेको भन्दै लेखिन्…
काठमाडौं । बलिउड अभिनेत्री मनिषा कोइरालाले संवैधानिक राजतन्त्र आवश्यक रहेको बताएकी छन् । गैरराजनीतिक चरित्रको राजसंस्थाको उनले वकालत गरेकी छन् ।
राजनीतिक दल भ्रष्ट भएको भन्दै उनले गणतन्त्र दिवसका अवसरमा उनले हिन्दु अधिराज्यको रूपमा आफ्नो पहिचान पुनः स्थापना गर्नुपर्ने बताएकी छन् ।
उनले सामाजिक सञ्जालमा लेखेकी छन् :– आजको दिन मेरो लागि गहिरो आत्मचिन्तनको हो । एक नेपालीको हैसियतले, जसले यो देशको पहिचान, एकता र भविष्यप्रति गहिरो माया राख्दछ । म आज मेरो सार्वजनिक मञ्च फेसबुकबाट बोल्दैछु, किनभने मलाई लाग्छ अब भावना होइन, सत्य र इमानदारीसाथ नेपालको दिशाबारे संवाद गर्नुपर्ने समय आएको छ ।
म स्पष्ट रूपमा विश्वास गर्छु कि नेपालले संसारको एक मात्र शान्तिपूर्ण हिन्दू अधिराज्यको रूपमा आफ्नो पहिचान पुनः स्थापना गर्नुपर्छ, जहाँ शासन बल वा कट्टरताले होइन, आध्यात्मिक मूल्य, सांस्कृतिक निरन्तरता र राष्ट्रिय एकताले निर्देशित हुन्छ ।
एक संवैधानिक राजतन्त्र, जुन राजनीतिक दलहरूभन्दामाथि हुन्छ, राष्ट्रिय एकताको प्रतीक हुनसक्छ । जुन राजनीतिक दलहरू, आफ्नो स्वभावले नै दिन सक्दैनन् । दलहरू प्रतिस्पर्धा गर्छन्, विभाजित गर्छन् र सरकार बनाउँछन् । तर राजतन्त्र, जुन हाम्रो सनातन धर्म र इतिहासमा गहिरो रूपमा जरा गाडिएको छ । एउटा यस्तो संस्थागत आधार हो जसले हामीलाई हाम्रो मौलिक पहिचान सम्झाउँछ ।
अझ महत्वपूर्ण कुरा, आजको राजनीतिक प्रणालीमा, जहाँ भ्रष्टाचार गहिरो रूपमा पसिसकेको छ, हामीलाई एउटा गैरराजनीतिक संस्था चाहिन्छ, जसले जनता, संस्कृति र राष्ट्रको मूल्यहरूको रक्षाका लागि सन्तुलन र नियन्त्रणको काम गर्न सकोस् ।
यो विभाजनको होइन यो राष्ट्रिय पुनर्जागरणको आह्वान हो । हामीले बिर्सनु हुँदैन हामी केवल एउटा सानो गणतन्त्र होइनौं जुन अनन्त राजनीतिक खेलमा अल्झिएको छ । हामी एउटा गौरवशाली सभ्यता हौँ, जसको विशिष्ट पहिचान र भविष्यप्रति पवित्र जिम्मेवारी छ ।
