घोकन्ते शैक्षिक प्रणालीलाई व्यंग्य गर्दै ‘रोल नं १’को गीत सार्वजनिक
काठमाडौं । चलचित्र ‘रोल नं १’को गीत सार्वजनिक भएको छ । सेभेन सिज सिनेमाको ब्यानरमा निर्माण भएको सिनेमाको शीर्ष गीत रिलिज भएको हो । शीर्ष गीतमा प्रशान्त शिवाकोटीको शब्द, संगीत तथा स्वर रहेको छ ।
सार्वजनिक गीतले नेपाली शिक्षा प्रणाली र विद्यालय तहमा हुने मूल्यांकन प्रणालीले बालबालिकाले भोग्नुपर्ने मनोवैज्ञानिक दबाबलाई मुख्य विषय बनाएको छ । जसमा एक ग्रामीण भेगको बालकको कथा देखाइएको छ । गीतका शब्दहरूले ‘अरू सबै मुर्ख, एउटै मात्र विद्वान’भन्दै विद्यालयमा पहिलो हुने विद्यार्थीलाई मात्र सम्मान दिने सामाजिक सोच गतल भएको प्रमाणित गर्ने प्रयास गरेको छ ।
गीतले बालमनोविज्ञान केलाउने प्रयास गरेको छ । पढाइसँगै गलत शैक्षिक प्रणालीका कारण बालबालिकामा त्यसको कस्तो असर पर्छ भन्ने यो सिनेमाको मुख्य कथा हो । सिनेमाको यही थिमको वरपर रहेर चलचित्रको गीत तयार भएको छ ।
गीतले घोकन्ते विद्या स्कुलमा बाहेक बाहिरी संसारमा काम नलाग्ने यथार्थलाई प्रस्ट पारेको छ । स्कुलमा जो अगाडि हुन्छ, स्कुल बाहिरको संसारमा ऊ नै सबैभन्दा पछाडि हुने गरेको कटु सत्यलाई गीतले छर्लङग पार्ने प्रयास गरेको छ ।
व्यवाहारिकता भन्दा धेरै टाढा रहेको नेपाली शिक्षा प्रणालीलाई व्यंग्य गरेको गीतले यथार्थमा बाँच्न प्रेरित गर्छ । बाल मनोविज्ञान बुझेर उसको रुचि केमा छ, त्यसमा बच्चैदेखि अभिभावकले सहयोग गर्दै त्यसैलाई करिअर बनाउन सहयोग गर्नुपर्नेमा गीतले जोड गरेको छ ।
भिडियोमा हिमाली भेगको सुन्दर दृश्य कैद छन् । मुख्य कलाकार फिचर्ड छन् । गीतले सिनेमालाई अपिलिङ बनाउने बल राख्ने देखिएको छ । भविष्य उज्योजा बनाउन स्कुल जाने विद्यार्थीमा उल्टै कस्तो असर परिरहेको छ देखाउने प्रयास गीतमार्फत गरिएको छ ।
‘हरेक विद्यार्थीको कथा’ स्लोगन दिएको विनोद पौडेलको चलचित्र ‘रोल नं १’ जेठ १५ गते (गणतन्त्र दिवस)बाट नेपालभरका हलमा प्रदर्शन हुँदैछ ।
जोन योञ्जनको निर्देशनमा तयार भएको चलचित्रमा मुकुन भुसाल, सुशांक मैनाली, रेणु योगी, सिर्जना अधिकारी मुख्य भूमिकामा छ । चलचित्रको बाल–कलाकारमा निर्भिक रेग्मी, रिन्चेन लामा, संयम कटुवाल, सिजल श्रेष्ठ रहेका छन् ।
विनोद पौडेल र जान्वी पौडेल निर्माता रहेको चलचित्रको सह–निर्मातामा छत्रमाया गिरी र रमेश चौलागाईं छन् ।
यो चलचित्रलाई महेश दवाडीले लेखेका हुन् । हिमाली जिल्ला म्याग्दीका विभिन्न रमणीय तथा ग्रामीण भेगहरूमा छायांकन गरिएको यो सिनेमाको डीओपी शिव राम श्रेष्ठ रहेका छन् ।
चलचित्रमा प्रशान्त शिवाकोटीको संगीत, रोहित शाक्यको विजिएम, फिरोड खड्का चिफ एडी, प्रोडक्सन डिजाइनरमा कला संग्रौला र प्रोडक्सन हेड मनोज जोशी रहेका छन् । चलचित्रका सम्पादक मदन घिमिरे हुन् ।
निर्माता पौडेलका अनुसार यो चलचित्र नेपालका साथै विदेशमा पनि एकसाथ प्रदर्शनमा ल्याइनेछ । चलचित्रलाई रिच इन्टरटेन्मेन्ट र जे एम सिनेमाले वितरण गर्ने जिम्मा लिएको छ ।
