एक दर्जन सिनेमा प्रदर्शन हुँदा ‘लालीबजार’ बन्यो वर्षकै सर्वाधिक कमाउने चलचित्र, ७ वटाको अवस्था के छ ?

काठमाडौं । नयाँ वर्ष २०८३ को सुरुवातसँगै नेपाली चलचित्र बजारमा देखिएको उच्च प्रतिस्पर्धाकाबीच अभिनेत्री स्वस्तिमा खड्का स्टारर चलचित्र ‘लालीबजार’ ले आफ्नो बर्चस्व कायम राखेको छ । वैशाख १ गतेदेखि हालसम्म करिब एक दर्जन चलचित्र प्रदर्शनमा आइसकेकोमा ‘लालीबजार’ यस वर्षकै सर्वाधिक कमाउने चलचित्र बन्न सफल भएको छ ।

हाल देशभरका सिनेमा घरहरूमा ७ वटा नेपाली चलचित्रहरू प्रदर्शन भइरहेका छन् । जसमा ‘लालीबजार’ सँगै ‘मितज्यू’, ‘काजी’, ‘परालको आगो’, ‘लाइफ ड्यामेज’, ‘रोल नं १’ र ‘कुम्भ’ रहेका छन् । यी मध्ये ‘मितज्यू’ र ‘काजी’ अघिल्लो शुक्रबार अर्थात् जेठ ८ बाट रिलिज भएका हुन् भने ‘रोल नं १’ र ‘कुम्भ’ गत शुक्रबारबाट प्रदर्शनमा आएका हुन् ।

वैशाख ११ गतेबाट प्रदर्शनमा आएको लक्ष्मण सुनार निर्देशित चलचित्र ‘परालको आगो’ ले पनि लामो समयदेखि हलमा आफ्नो उपस्थिति जनाइ रहेको छ । यो सिनेमा मोफसलको हल सिने रोयलमा मात्र प्रदर्शनरत छ ।

• 

प्रदर्शनरत नेपाली चलचित्रहरूको चलचित्र विकास बोर्डको बक्स अफिस प्रणाली (सिनेपा) का अनुसार जेठ ९ गतेसम्म ‘लालीबजार’ ले ५ करोड ७६ लाख ३९ हजार ४७२ रुपैयाँ ग्रस कलेक्सन गरेको रिपोर्ट सार्वजनिक गरेको थियो । निर्माण पक्षले भने चलचित्रले ७ करोड माथिको व्यापार गरिसकेको दाबी गरेका छन् ।

शनिबार फिल्मका निर्माताले आधिकारिक रूपमा कमाइको विवरण सार्वजनिक गर्दै चलचित्रले ७ करोड ५३ लाख माथि व्यापार गरेको जानकारी दिएका हुन् । यो कमाइ सँगै ‘लालीबजार’ यस वर्षको सबैभन्दा बढी कमाइ गर्ने नेपाली सिनेमा बनेको छ ।

गत वैशाख २५ गतेदेखि देशभरका सिनेमा हलमा प्रदर्शनमा आएको यस चलचित्रले सुरुवाती दिनदेखि नै दर्शकको राम्रो साथ पाएको थियो । पछिल्लो समय नेपाली फिल्मको बजार सुस्ताइरहेका बेला यस चलचित्रको सफलताले चलचित्रकर्मी र हल सञ्चालकहरूमा नयाँ उत्साह थपेको छ । मल्टिप्लेक्सदेखि सिंगल स्क्रिनसम्म चलचित्रको ‘अकुपेन्सी’ अझै पनि सन्तोषजनक देखिएको निर्माण टिमको भनाइ छ ।

यस वर्ष रिलिज भएका अन्य चलचित्रको तुलनामा ‘लालीबजार’ को व्यापार निकै बलियो देखिएको हो । यस बीचमा केही चलचित्रहरूले भने बक्स अफिसमा अपेक्षाकृत जादु देखाउन सकेनन् र हलबाट उत्रिसकेका छन् । गत वैशाख १ गते प्रदर्शनमा आएको तुलसी घिमिरे निर्देशित चलचित्र ‘पहाड’ले खासै राम्रो कमाइ गर्न सकेन । यसले घरेलु बक्स अफिसमा ६३ लाख ९३ हजार १६२ रुपैयाँ ग्रस कमाइ गर्‍यो ।

यसपछि वैशाख ११ गतेबाट प्रदर्शनमा आएको लक्ष्मण सुनार निर्देशित सिनेमा ‘परालको आगो’ ४ करोड २७ लाख ६३ हजार ६४६ रुपैयाँ ग्रस कमाएको छ ।

वैशाख २५ गते ‘लालीबजार’ सँगै रिलिज भएको प्रकु पाण्डेयको निर्देशन तथा विजय बराल र वर्षा राउतको मुख्य भूमिका रहेको चलचित्र ‘मालती मंगले’ले ५१ लाख ६३ हजार ६९३ रुपैयाँ ग्रस कमाइ गरेको छ । यस्तै सोही दिन प्रदर्शन भएको प्रेम सोनी सुनारले निर्देशन गरेको चलचित्र ‘गुरूआमा’ ले २९ लाख ४२ हजार रूपैयाँ ग्रस कलेक्सन गरेको बोर्डको तथ्याङ्कमा उल्लेख छ ।

यसपछि जेठ १ गते रिलिज भएका अन्य दुई चलचित्रहरू ‘लाइफ ड्यामेज’ले २८ लाख ४६ हजार र ‘एक मुठ्ठी बादल’ले ५ लाख २१ हजार ग्रस कलेक्सनको व्यापार गरेको देखिएको छ ।

त्यस्तै, जेठ ८ गते प्रदर्शनमा आएका चलचित्रहरू ‘मितज्यू’ र ‘काजी’ को व्यापारिक नतिजा भने भोलि सोमबारको रिपोर्टमा सार्वजनिक हुने छ भने लालीबजार, परालको आगो, मालती मंगले, गुरूआमा, लाइफ ड्यामेज र एक मुठ्ठी बादलको पछिल्लो व्यापारिक विवरण (बक्सअफिस रिपोर्ट) पनि सार्वजनिक हुनेछ ।

यस्तै, शुक्रबारबाट प्रदर्शनमा आएका चलचित्र ‘रोल नं १’ र ‘कुम्भ’को  व्यापारिक विवरण (बक्सअफिस रिपोर्ट) भने अर्को साताको सोमबार बाहिर आउने छ ।

यम थापाको लेखन तथा निर्देशनमा तयार भएको ‘लालीबजार’मा स्वस्तिमाका साथमा रवीन्द्रसिंह बानियाँ, विशाल देवकोटा, प्रशंसा सुवेदी, समाइरा थापा र मुकुन्द श्रेष्ठ लगायतका कलाकारहरूको अभिनय छ ।

‘षट्कोण आर्ट्स’को ब्यानरमा निर्माण भएको यस चलचित्रका निर्माता म्याक्स दीपेश खत्री हुन् । निर्देशक तथा लेखक प्रदीप भट्टराईले यस चलचित्रमा कार्यकारी निर्माताको भूमिका निभाएका छन् ।

पछिल्लो समय रिलिज भएका फिल्महरूको बक्स अफिस विवरण:

क्र.सं.	फिल्मको नाम	रिलिज मिति	कुल आम्दानी (रु.)	कुल दर्शक (टिकट)
१.	लालीबजार	वैशाख २५	५,७६,३९,४७२	१,९६,४०६
२.	परालको आगो	वैशाख ११	४,२७,६३,६४६	१,५३,९२६
३.	राम नाम सत्य	चैत २७	३,४०,८१,६९१	१,२१,४०६
४.	पहाड	वैशाख १	६३,९३,१६२	२०,२६६
५.	मालती मङ्गले	वैशाख २५	५१,६३,६९३	१६,१३७
६.	गुरुआमा	वैशाख २५	२९,४२,५७६	९,३२७
७.	लाइफ ड्यामेज	जेठ १	२८,४६,२७०	९,२४१
८.	एक मुठ्ठी बादल	जेठ १	६,२१,८२६	१,६०१