महँगो मुल्यमा विक्री भयो ‘म मदनकृष्ण’को डिजिटल राइट्स
काठमाडौं । भदौ दोस्रो सातादेखि छायांकन सुरु गरिने बायोपिक चलचित्र ‘म मदनकृष्ण’को डिजिटल अधिकार कीर्तिमानी मूल्यमा बिक्री भएको छ । नेपालको प्रतिष्ठित डिजिटल कम्पनी ‘ओएसआर डिजिटल’ले सिनेमाको ब्रान्ड भ्यालुलाई मध्यनजर गर्दै मोटो रकम खर्चेर यसको अधिकार सुरक्षित गरेको हो ।
यो चलचित्रलाई बायोपिक सिनेमामा अब्बल निर्देशक मानिएका निर्देशक मिलन चाम्सले निर्देशन गर्दैछन् । ७६ वर्षिय वरिष्ठ कलाकार मदनकृष्ण श्रेष्ठको जीवनीमा आधारित बायोपिक सिनेमा ‘म मदनकृष्ण’को असारको पहिलो साता निर्माणको घोषणा गरिएको थियो ।
मदनकृष्णको बाल्यकाल, सरकारी जागिरे जीवन, हरिवंशसँगको सहकार्य, अन्तरजातीय विवाह, साथै मदनकृष्णको जिन्दगीका सुख, दुःख समेट्दै उनको सम्पूर्ण जीवन संघर्ष र आरोह-अवरोहलाई समेटेर निर्माण हुने यो चलचित्र महँगो मुल्यमा डिजिटल राइट ओएसआर डिजिटलले खरिद गरेको निर्माण टिमले जानकारी गराएको छ ।
निर्देशक चाम्स भन्छन्, ‘ध्रुर्व सत्य कुरा के हो भने, ओएसआरले अहिलेसम्मकै महँगो मूल्यमा हाम्रो सिनेमाको डिजिटल राइट्स खरिद गर्नुभएको छ । यो मदनकृष्ण दाइप्रतिको सम्मान र उहाँको ब्रान्ड भ्यालुको नतिजा हो ।’
नेपाली चलचित्र इतिहासमा कुनै चर्चित व्यक्तिको जीवनीमा सिनेमा बन्नु नयाँ कुरा नभए पनि, कुनै ‘अभिनेता’ माथि बायोपिक बन्न लागेको यो पहिलोपटक हो । यसअघि गायक भक्तराज आचार्यको जीवनमा ‘आचार्य’ बनेको थियो भने अन्य क्षेत्रका व्यक्तित्वका बायोपिक पनि बनेका थिए । तर, रङ्गमञ्च र सिनेमाका हस्ती मदनकृष्ण श्रेष्ठमाथि फिल्म बन्नुलाई नेपाली सिनेमाको एक ऐतिहासिक पाइला मानिएको छ ।
मदनकृष्णको बायोपिकमा मदनकृष्णको भूमिका अभिनेता महेश त्रिपाठीले निर्वाह गर्नेछन् । यो बायोपिकको शीर्ष भूमिकामा दर्शकले केकी अधिकारीलाई देख्न पाउनेछन् । उनले मदनकृष्णकी श्रीमती यशोदाको भूमिका निर्वाह गर्नेछिन् ।
मदनकृष्ण श्रेष्ठको चर्चा गर्दा उनको ‘मह’ जोडीका अर्का खम्बा हरिवंश आचार्यको प्रसंग नआउने कुरै हुँदैन । चलचित्रमा हरिवंश आचार्यको भूमिका कसले निभाउनेछ भन्ने विषयलाई अहिले निकै गोप्य र कौतुहलतापूर्ण राखिएको छ ।
यस्तै, चलचित्रमा राजाराम पौडेल, किरण केसी, रुषा न्यौपाने, यमन श्रेष्ठ, देशभक्त खनालको पनि अभिनय रहनेछ ।
भिन्टेज मोसन पिक्चर्सको प्रस्तुति बायोपिक ‘म मदनकृष्ण’लाई राजकुमार श्रेष्ठले निर्माण गर्नेछन् । लोकप्रिय कलाकार भएकाले मदनकृष्णको बायोपिक प्रतिक्षित बन्ने निश्चित छ ।
चलचित्रको कथा तथा पटकथा यम थापाले लेखेका हुन् । पदम बहादुर श्रेष्ठ (बाबु श्रेष्ठ) डीओपी रहेको चलचित्रमा मिलन श्रेष्ठ सम्पादन, अलिश कार्की ब्याकग्राउन्ड म्युजिक, भरत कँडेल साउन्ड डिजाइन रहेका छन् ।
भदौ दोस्रो सातादेखि छायांकन सुरु गरिने यो चलचित्रलाई रिच इन्टरटेनमेन्ट, एप्पल इन्टरटेनमेन्ट, र एफ.डी. कम्पनीले वितरण गर्ने छन् ।
