शनाया कपूर डेब्यू फिल्मबाटै ट्रोल, ५० लाख पनि कमाउन सकेन

काठमाडौं । अभिनेता संजय कपूरकी छोरी शनाया कपूरले फिल्म ‘आँखों की गुस्ताखियाँ’ बाट बलिउडमा आफ्नो डेब्यू गरेकी छन् । निर्देशक सन्तोष सिंहको निर्देशनमा बनेको यो फिल्म जुलाई ११ शुक्रबारबाट रिलिजमा आएको हो । यो फिल्म रिलिज भएसँगै सामाजिक सञ्जालमा यसबारे तीव्र प्रतिक्रिया आउन थालेको छ ।

शनायाको पहिलो अभिनय प्रयासलाई लिएर दर्शकहरूबीच मिश्रित प्रतिक्रिया देखिएको छ । फिल्ममा शनायाको अभिनयलाई मानिसहरूले मन पराएका छैनन्, जसका कारण उनी अहिले ट्रोलको निशानामा परेकी छन् ।

कतिपय दर्शकले उनको अभिनयलाई कमजोर भनेका छन् भने केहीले विक्रान्त मेसीसँगको जोडीलाई आकर्षक मानेका छन् ।

• 
• 
• 

एक प्रयोगकर्ताले सामाजिक सञ्जालमा लेखेका छन्, “नेपो किड शनाया कपूरलाई बलिउडमा स्वागत छ । अभिनय अत्यन्तै कमजोर छ । फिल्म बोरिङ छ र स्क्रिप्टले दर्शकलाई आकर्षित गर्न सक्दैन।”

अर्का एक दर्शकले लेखेका छन्, “यो फिल्म प्रेमकथा भन्दा पनि अभिनय प्रशिक्षण सत्र जस्तो देखिन्छ । शनायाले आफ्नो भूमिका भित्र पसेकी छैनन्।”

त्यस्तै, अर्का दर्शकले लेखेका छन्, “राम्रो संगीतको बावजुद, फिल्ममा खासै उत्साह छैन । लक्षित दर्शकलाई समेत यसको रिलिजबारे जानकारी छैन । फिल्मले पहिलो दिन ५ करोड कमाउन सक्ने देखिँदैन । शनायाले राम्रो प्रोजेक्ट रोजेकी भए राम्रो हुन्थ्यो ।”

यद्यपि, सबै प्रतिक्रियाहरू नकारात्मक मात्र छैनन् । प्रयोगकर्ता सूर्यकान्तले लेखेका छन्, “‘आँखों की गुस्ताखियाँ’ प्रेमको ताजापन बोकेको फिल्म हो । विक्रान्तको अभिनय सधैं जस्तै प्रभावशाली छ। शनायाले डेब्यूको हिसाबले राम्रो प्रयास गरेकी छन्, अझ धेरै सिक्न बाँकी छ ।”

रवि चौधरीले फिल्मको छायांकन र विक्रान्तको अभिनयको प्रशंसा गर्दै भनेका छन्, “यो दृश्यात्मक रूपमा सुन्दर फिल्म हो। भावनात्मक गहिराइ छ, तर स्क्रिप्ट अनुमान गर्न सकिने छ।”

फिल्म ‘आँखों की गुस्ताखियाँ’ लेखक रस्किन बन्डको चर्चित लघुकथा ‘The Eyes Have It’ मा आधारित छ । फिल्ममा शनाया कपूर र विक्रान्त मेसी मुख्य भूमिकामा छन् ।

तर बक्स अफिसको हिसाबले भने शनायाको डेब्यू फिल्म निराशाजनक देखिएको छ । बक्स अफिस ट्र्याकर स्याकनिल्कका अनुसार फिल्मले पहिलो दिन जम्मा ३५ लाख रुपैयाँको कमाइ गरेको छ । तुलना गर्दा सोही दिन रिलिज भएको राजकुमार रावको फिल्म ‘मलिक’ ले पहिलो दिनमै ४.०२ करोड रुपैयाँ कमाउन सफल भएको थियो।

यसअघि विक्रान्त मेसी अभिनित फिल्म ‘द साबरमती रिपोर्ट’ ले पनि पहिलो दिन १.२५ करोड रुपैयाँ कमाइ गरेको थियो । यसकारण, ‘आँखों की गुस्ताखियाँ’ को कमजोर सुरुवातले न त शनाया न त विक्रान्तका लागि उत्साहजनक संकेत दिएको देखिन्छ ।

शनायाको डेब्यूलाई लिएर सामाजिक सञ्जालमा उठेका आलोचनाहरूले फेरि एक पटक ‘नेपो किड’ बहसलाई बल दिएका छन्। बलिउडमा स्टार किड्सको प्रवेश सधैं चर्चाको विषय बनिरहन्छ र शनायाको पहिलो फिल्मले यो बहसलाई अझ चर्काएको छ।