चर्चामा ‘माग्ने राजा’, यी हुन् यो चलचित्रका सकारात्मक पक्ष
काठमाडौं । चलचित्र ‘माग्ने राजा’ भदौ ६ गते रिलिज हुँदै छ । यो चलचित्रमा केदार घिमिरे (माग्ने बुढा) मुख्य भूमिकामा छन् ।
निर्माण घोषणा हुँदैदेखि यो चलचित्र चर्चामा छ । विशेषगरी केदार घिमिरेको पहिलो सोलो लिड भएकाले पनि यो सिनेमा कस्तो होला भन्ने धेरैमा कौतुहलता छ ।
यसैगरी उनको यो सिनेमामा लिएको पारिश्रमिकलाई लिएर पनि ‘माग्ने राजा’ चर्चामा छ । ६१ लाख पारिश्रमिक दिएको हो भन्ने निर्माता र होइन भन्ने केदारका कारण पनि यो चलचित्रको हाइप छ ।
दीपकराज गिरीको टिमबाट पहिलोपटक बाहिरको ब्यानरको चलचित्र र त्यसमा पनि लिड रोलमा रहेका कारण पनि यो चलचित्र चर्चामा छ । संयोग के परेको छ भने ‘छक्का पञ्जा ५’मा दीपकको अपोजिटमा वर्षा शिवाकोटी थिइन् । ‘माग्ने राजा’मा केदारको अपोजिटमा पनि वर्षा नै छिन् ।
‘माग्ने राजा’ मार्फत यसका निर्देशक ऋषि लामिछाने ८ वर्ष पछि निर्देशनमा फर्किंदैछन् । त्यसैले उनको कमब्याक पनि कस्तो रहनेछ भन्ने कौतुहलता छ ।
अनुभवी लेखक सामिप्यराज तिमलसेनाले स्क्रिप्ट लेखेका छन् । त्यसैले यो सिनेमाले राम्रो व्यापार गर्नेमा निर्माणपक्ष विश्वस्थ छ ।
‘माग्ने राजा’को निर्माता मुनाल घिमिरे हुन् । उनी चलचित्र ‘इच्छा’ पछि चलचित्र निर्माणमा फर्केका छन् । उनी हाल दाङको घोराही उपमहानगरपालिका वडा नम्बर ४ का वडा अध्यक्ष समेत हुन् ।
‘माग्ने राजा’मा केदार र वर्षासहित पुष्कर गुरुङ, शिशिर वाङ्देल, शारदा गिरी र टिकटकर मोडल पवित्रा साकी उर्फ मिस पबीको अभिनय छ ।
या चलचित्रमा आर्यन सिग्देलको पनि विशेष भूमिका रहेको छ । आरआर फिल्मस्ले वितरण गर्ने सिनेमामा नरेन्द्र मैनालीको छायांकन, सामिप्यराज तिमल्सेनाको कथा, पटकथा तथा संवाद छ । दीपक शर्मा बाबुल गिरीको संगीत रहेको छ ।