त्रिशलाको गुनासो- सम्झौताको मजाक बनाइयो, तीन महिना बितिसक्दा पनि पारिश्रमिक पाइएन
काठमाडाैं । नेपाली संगीत क्षेत्रमा सक्रिय गायिका तथा सिंगिङ रियालिटी शो ‘सिंगिङ स्टार नेपाल’की निर्णायक त्रिशला गुरुङले आफूले पारिश्रमिक नपाएको गुनासो गर्दै सामाजिक सञ्जालमार्फत सार्वजनिक रूपमा गुनासो सार्वजनिक गरेकी छिन् ।
त्रिशलाले फेसबुकमा लेखेको स्टाटसमा कार्यक्रम सुरु भएको तीन महिना बितिसक्दा पनि आफूले सम्झौताअनुसारको रकमको आधा समेत प्राप्त नगरेको उल्लेख गरेकी छिन् ।
उनले ‘सिंगिङ स्टार नेपाल’मा निर्णायक (जज)को भूमिकामा काम गर्दा पूर्ण रूपले पेशागत प्रतिबद्धता देखाएको दाबी गर्दै शोको आयोजक पक्षले भने गैरजिम्मेवारीपन देखाएको आरोप लगाएकी छिन् ।
उनले लेखेकी छिन्, “आज हाम्रो देशको मनोरञ्जन उद्योगको अवस्था देखेर म अत्यन्तै दुखी छु । तपाईंहरूले याद गर्नुभएकै छ कि म यस वर्ष सिंगिङ स्टार नेपालको एक जजको रूपमा थिएँ । हामी सधैँ हाम्रो कामप्रति इमानदार थियौं र ब्रान्डलाई आफ्नै जस्तो मानेर काम गर्यौं । तर कार्यक्रम सुरु भएको ३ महिना बितिसक्दा पनि सम्झौतामा उल्लेख गरिएको पारिश्रमिकको आधा रकमसमेत हामीले पाएका छैनौं ।”
त्रिशलाका अनुसार कार्यक्रमका संयोजक तथा निर्देशक प्रमोद भण्डारी हाल सम्पर्कविहीन अवस्थामा छन् । उनले आरोप लगाउँदै लेखेकी छिन्, “कार्यक्रमका प्रोजेक्ट हेड पुरै टिमलाई बेवास्ता गरेर बसेका छन् । यो उद्योगमा गरिएका सम्झौताहरू मजाक बनाइएको छ।”
पारिश्रमिकसम्बन्धी समस्याले आफू मात्र होइन, सम्पूर्ण प्राविधिक तथा सहकर्मीहरू पनि प्रभावित भएको त्रिशलाको भनाइ छ । उनले सामाजिक सञ्जालमार्फत आफूलाई यस्ता समस्याबाट कसरी बाहिर निस्कने भन्ने सन्दर्भमा सुझाव दिनसमेत आग्रह गरेकी छिन् ।
‘सिंगिङ स्टार नेपाल’ शो प्राइम टेलिभिजनबाट हरेक शनिबार र आइतबार राति ९ बजे प्रसारण हुँदै आइरहेको छ । यस शोमा त्रिशलासँगै संगीतकार अर्जुन पोखरेल र गायक सनुप पौडेल निर्णायकको भूमिकामा रहेका छन् ।
शोको लोकप्रियता तिब्ररूपमा बढ्दै गए पनि भित्री व्यवस्थापन र पारिश्रमिक प्रकरणले गर्दा कलाकारबीच असन्तोष चुलिएको देखिन्छ । यो प्रकरणले नेपाली रियालिटी शो उत्पादन र कलाकार व्यवस्थापनको प्रश्नलाई फेरि एकपटक सतहमा ल्याएको छ ।