‘सैयारा’ले ७ दिनमा कति कमायो ? चाँडै तोड्न सक्छ अक्षय-अजयको विश्वव्यापी रेकर्ड
काठमाडौं । भारतीय बक्सअफिसमा यतिबेला एक नयाँ र रोमान्टिक फिल्म ‘सैयारा’ ले धुम मच्चाइरहेको छ । निर्देशक मोहित सुरीको प्रस्तुतिमा तयार गरिएको यो फिल्मले रिलिजको एक साताभित्रै उल्लेखनीय कमाई गर्दै दर्शक र समीक्षक दुवैको ध्यान तानेको छ । नयाँ कलाकार अहान पाण्डे र अनीत पड्डाको अभिनयले फिल्मलाई विशेष बनाइदिएको छ भने यसको कथा र संगीतले युवा दर्शकमाझ गहिरो छाप छोडिरहेको छ ।
सात दिनमै २२५ करोड पार
रिलिजको पहिलो दिनदेखि नै सकारात्मक प्रतिक्रिया पाएको ‘सैयारा’ ले अहिले सम्म विश्वभरबाट २२५.७३ करोड रुपैयाँ कलेक्सन गरिसकेको छ ।
यति छोटो समयमै फिल्मले भारतमै मात्र १६७.१४ करोड रुपैयाँ कमाइसकेको छ। यद्यपि सातौं दिन अर्थात् बिहीबार, फिल्मको आम्दानीमा थोरै गिरावट देखिएको छ । प्रारम्भिक तथ्यांक अनुसार, ७ औं दिनमा १३.३९ करोड रुपैयाँको कलेक्सन भएको छ ।
विश्वव्यापी पाँचौं नम्बरमा ‘सैयारा’
बक्स अफिसको हालसम्मको स्थिति हेर्दा, ‘सैयारा’ यस वर्ष रिलिज भएका फिल्महरूको विश्वव्यापी कमाई सूचीमा पाँचौं स्थानमा उक्लिएको छ। अब यसले अजय देवगनको ‘रेड २’ (२३७ करोड) र अक्षय कुमारको ‘हाउसफुल ५’ (२८८.५८ करोड) को रेकर्डलाई पछ्याउने बाटोमा छ । तुलना गर्ने हो भने, ‘सितारे जमीन पर’ ले २६३ करोड र वर्षकै सबैभन्दा सफल फिल्म ‘छावा’ले ८०७.८८ करोडको कमाई गरिसकेको थियो ।
६० करोडको बजेट, हिटको दर्जामा
केही मिडिया रिपोर्ट अनुसार, ‘सैयारा’ को निर्माण बजेट करिब ६० करोड रुपैयाँ रहेको छ। यस आधारमा हेर्दा, फिल्मले नाफा कमाउने मात्र होइन, पहिले नै सुपरहिट को सूचीमा आफ्नो स्थान सुरक्षित गरिसकेको छ। निमार्ताहरूले यसलाई ठुलो सफलताको रूपमा लिइसकेका छन् ।
यो फिल्मले सलमान खानको ‘सिकन्दर’, अक्षय कुमारको ‘स्काइ फोर्स’ र ‘केशरी च्याप्टर २’, सनी देओलको ‘जाट’ र राजकुमार रावको ‘भूल चूक माफ’को ‘लाइफटाइम कलेक्सन’लाई उछिनिसकेको छ । यसबाहेक ‘सैयारा’ले आठवटा नयाँ रेकर्ड समेत बनाएको छ ।
फिल्म ‘सैयारा’को नाममा बनेको पहिलो रेकर्ड हो, कुनै पनि नयाँ कलाकारको फिल्मले गरेको सबैभन्दा ठूलो ओपनिङ । यो फिल्मले लगभग २२ करोडको ओपनिङ गरेको थियो ।
फिल्म ‘सैयारा’ को कथा दुई पात्र कृष र वाणीको प्रेमकथामा आधारित छ । कृषको भूमिका नव-नायक अहान पाण्डेले निभाएका छन् भने वाणीको भूमिकामा अनिता पड्डा देखिएकी छन् । संगीत, संवाद र दृश्यावलोकनले फिल्मलाई अत्यन्तै भावुक र आकर्षक बनाएको छ । विशेषगरी युवा दर्शकबीच यसको संगीत लोकप्रिय बन्दै गएको छ ।
फिल्म ‘सैयारा’ ले हालसम्म प्राप्त उचाइलाई कायम राखेमा, निकट भविष्यमा ३०० करोड क्लबमा प्रवेश गर्ने अनुमान गरिएको छ। आगामी सप्ताहन्तमा कलेक्सन फेरि उचाइमा पुग्ने विश्लेषकहरूको आकलन छ।
‘सैयारा’ अहिलेको फिल्म बजारमा एउटा चम्किलो उदाहरण बनेको छ – नयाँ कलाकार, सशक्त निर्देशन, भावनात्मक कथा र मनछुने संगीतको कारण यो फिल्मले छोटो समयमै दर्शकको मन जित्न सफल भएको छ। अब हेर्न बाँकी छ, के ‘सैयारा’ अर्को नयाँ कीर्तिमान बनाउनेछ ?
‘सैयारा’ले भारतसँगै नेपालको बक्सअफिसमा कीर्तिमानी कमाइ गरिरहेको छ । बुधबार अपराह्नसम्म फिल्मले नेपालमा २ करोड ५३ लाख ग्रस कमाइ गरेको छ ।