चलचित्र ‘जनक्रान्ति’ निर्माण हुने, प्रचण्डद्वारा पहिलो पोस्टर सार्वजनिक
काठमाडौं । गणतन्त्र स्थापनाका लागि भएका ऐतिहासिक जनआन्दोलनलाई आधार मानेर तयार गरिने नेपाली कथानक चलचित्र ‘जनक्रान्ति’ निर्माण हुने भएको छ ।
शनिवार गणतन्त्र नेपालका प्रथम प्रधानमन्त्री तथा नेकपा (माओवादी केन्द्र) का अध्यक्ष पुष्पकमल दाहाल ‘प्रचण्ड’ले उक्त चलचित्रको पहिलो पोस्टर सार्वजनिक गरेसँगै निर्माणको घोषणा गरिएको हो ।
पोस्टर विमोचन कार्यक्रममा बोल्दै प्रचण्डले ‘जनक्रान्ति’ चलचित्रले गणतन्त्र स्थापनाको आन्दोलन र त्यसपछिको सामाजिक, राजनीतिक तथा आर्थिक परिवर्तनबारे नयाँ पुस्तालाई बुझ्न सहयोग पुग्ने विश्वास व्यक्त गरे । उनले भने, “हिजोको समाजको अवस्थाबारे नयाँ पुस्ताले जान्न जरुरी छ, यस्ता चलचित्रले त्यो समझदारी बढाउँछ ।”
चलचित्र रुद्राक्ष फिल्म्स प्रा.लि. को ब्यानरमा निर्माण हुने भएको हो । निर्देशन उपेन्द्र तिमिल्सिनाले गर्नेछन् भने निर्माता रुद्रप्रसाद खनाल हुन् । निर्माण टोलीका अनुसार चलचित्रको छायांकन आगामी भदौ दोस्रो साताबाट सुरु हुनेछ । प्रदर्शन मिति भने २०८२ सालको फागुन १ गते तय गरिएको छ ।
निर्देशक तिमिल्सिनाका अनुसार चलचित्रमा विभिन्न कालखण्डमा गणतन्त्र स्थापनाका लागि भएका जनआन्दोलनहरूको पृष्ठभूमिलाई समेटिएको छ । “सत्य घटनामा आधारित यो चलचित्रले नेपालको राजनीतिक इतिहास बुझ्न नयाँ पुस्तालाई सजिलो बनाउने विश्वास छ,” उनले बताए ।
चलचित्रको छायांकन रुकुम, रोल्पा, जाजरकोट, जुम्ला, कालिकोट, बाँके, बर्दिया, साथै पूर्वी नेपालको धनकुटा, खोटाङ, भोजपुर र तराई मधेशको सर्लाही जिल्लामा हुने निर्माण पक्षले जानकारी दिएको छ ।
